Forbes é a revista que gosta d@s ric@s e da que gostan @s ricos. Este magazine especializado no mundo dos negocios e as finanzas posúe delegación no Estado español, que vén de elaborar un informe sobre as 100 personalidades españolas máis ricas. Un documento que vai ser publicado a finais do presente mes mais do que xa se adiantaron algúns datos. Por exemplo, que entre 30 familias do Estado español atesouran máis de 32.000 millóns de euros. Unha cifra enorme. Por exemplo, catro veces os orzamentos públicos da Xunta de Galiza para 2014.
E tan só entre tres destas familias manexan máis de 11.200 millóns de euros. Amancio Ortega encabeza a clasificación, nada estraño se temos en conta que o propietario de Inditex é a terceira fortuna do mundo.
Nomes e preferencias
Segundo adianta a propia revista Forbes, entre as 100 personalidades máis ricas do Estado español están Juan Roig (Mercadona); Isak Andic e familia (Mango); Manuel Jove; Rafael del Pino (Ferrovial); Juan Abelló; Florentino Pérez (ACS); ou Gabriel Escarrer (Meliá).
Forbes afirma que entre os nichos de negocio nos que se asentaron estas familias para conseguir as súas fortunas están o sector téxtil, a venda de inmobles, o mundo dos investimentos, finanzas bursátiles ou a alimentación, entre outros.
Poñer os cartos lonxe de Facenda
Ademais, a maior parte destas familias puxeron a salvo os seus beneficios mediante o que se coñece eufemisticamente como “internacionalización de empresas” (operación para non pagar tantos impostos) principalmente en Holanda, Luxemburgo e Suíza.
