mércores 05/08/20

Repsol non poderá abrir gasolineiras na Galiza até 2021

A petroleira Repsol supera 30% de cota de mercado que marca a normativa.
Estación de servizo de Repsol en Santiago de Compostela. (Xoán Roberes)
Estación de servizo de Repsol en Santiago de Compostela. (Xoán Roberes)

Repsol non ten permiso para abrir novas estacións de servizo na Galiza en 2020. Así se desprende da resolución da Dirección Xeral de Política Enerxética e Minas publicada esta quinta feira no Boletín Oficial do Estado (BOE) pola que a petroleira española deberá limitar o seu crecemento para cumprir así coa normativa sobre competencia no sector dos hidrocarburos.

Será a única compañía que teña limitacións para crecer na Galiza, como tamén a terán en Asturias, Aragón, A Rioxa, Baleares, Cantabria, Castela-A Mancha e Madrid. A petroleira Cepsa, pola súa banda, tampouco poderá expandir a súa rede de estacións de servizo en territorios como Ceuta, Melilla ou as illas de Formentera, Ibiza e Menorca nos próximos 12 meses.

 A Lei 8/2015 de 21 de maio establece que os operadores cunha cota de mercado superior a 30% non poderán incrementar o número de instalacións en réxime de propiedade o en virtude de calquera outro título que lles confira a xestión da instalación. Con todo, a norma permite aos operadores renovar os contratos preexistentes, aínda cando con iso superen a cota de mercado establecida como tope. O que non poderán facer é firmar novos contratos de distribución en exclusiva con distribuidores minoristas que se dedique á explotación da instalación para a subministración de combustíbeis e carburantes a vehículos, con independencia de quen ostente a titularidade da mesma. 

Fórmula de cálculo

Para computar a porcentaxe de cota de mercado, segundo figura na normativa, téñense en conta as ventas anuais do exercicio anterior das instalacións para subministro a vehículos incluídas na rede de distribución do operador ao por maior ou operadores do mesmo grupo empresarial, contidas en cada territorio. No caso da Galiza só Repsol as supera.

comentarios