Esta segunda feira veñen de se coñecer os datos referentes ao Índice de produción industrial (IPI), que en Galiza medrou en novembro un 3,7%, dous puntos por baixo do que o IPI español aumentou nese mesmo período (5,7%). Novos indicadores estes que inciden no risco de 'desenganche' da economía galega a respeito da Estatal, algo que advirte non só a oposición senón tamén analistas e expertos como os do Foro Económico de Galiza.
A produción industrial en Galiza, pois, fica 2 puntos por baixo da media do Estado español. A isto hai que engadir que tamén na evolución do PIB o noso país segue a estar a distancia da media española. O PIB galego experimentou un medre dun 2,1% interanual, lonxe do case 4% que medra o Estado español, practicamente o duplo.
Economistas como Fernando González Laxe ou Santiago Lago Peñas consideraron xa no seu momenton que as dúas causas esenciais do peor comportamento da economía galega son o menor gasto público en Galiza; e o menor consumo privado.
Á vista destes datos, consideran que “debemos ser moi cautos” coa linguaxe da saída da crise, pois dende que comezou a denominada recuperación económica, Galiza só recuperou 2,5 puntos dos 9 puntos de riqueza (PIB) perdidos durante a crise. Mentres que nivel do Estado español xa se recuperou case a metade dos puntos que o PIB perdeu durante a crise.
