O prezo da vivenda libre na Galiza experimentou un aumento de 6,6 % no ano 2022 a respecto do ano precedente, mentres que a suba foi de 4,5 % no último trimestre do pasado ano, en comparanza co mesmo trimestre de 2021. Así se reflicte nos datos do Índice do Prezo da Vivenda (IPV) publicados esta cuarta feira polo INE, que tamén sinalan que a repunta media do prezo o ano pasado está dous puntos por riba da rexistrada en 2021.
En 2022 o prezo das casas e pisos de nova construción no país aumentou, de media, en 7,6%, mentres que o prezo da vivenda de segunda man tamén se incrementou, no seu caso en 6,4 %.
Segundo este mesmo informe, o índice xeral de prezos experimentou nos tres últimos meses do ano pasado unha suba interanual de 4,5%, fronte ao 5,5% da media estatal. No caso da variación trimestral, o índice galego situouse en -0,6 %, dúas décimas máis que no conxunto do Estado español, que reflicte unha baixada de 0,8 %.
Por tipo de vivenda, o prezo da vivenda nova na Galiza aumentou en 1,3 % no último trimestre de 2022, mentres que a variación interanual, con respecto ao mesmo trimestre do ano anterior, foi de +7%.
O prezo da vivenda usada, pola contra, descendeu no último trimestre, en comparación co trimestre anterior, en 0,9%. A variación interanual neste caso foi positiva, de +4%.
Datos estatais
No Estado español, o prezo da vivenda libre subiu unha media de 7,4% en 2022, rexistrando así a súa novena repunte anual consecutiva e a maior alza desde 2007, cando o prezo aumentara en 9,8 %. A suba experimentada en 2022 duplica a de 2021 (+3,7%) e é consecuencia tanto da aceleración dos prezos da vivenda de segunda man como dos pisos novos.
Así, o prezo da vivenda nova subiu unha media de 7,9% en 2022, o maior incremento desde 2007, cando fora de 11,9 %. Pola súa parte, o prezo da vivenda usada aumentou en 7,3% en 2022, o dobre que en 2021 e a maior repunta tamén desde 2007, cando medrara 8,2%.
No cuarto trimestre de 2022, o prezo da vivenda libre subiu un 5,5% a respecto do mesmo período do ano anterior. Por tipo de vivenda, o prezo da vivenda nova subiu 6,2% no último trimestre do ano pasado comparación co cuarto trimestre de 2021, nove décimas por baixo da taxa do terceiro trimestre.
Pola súa parte, o prezo da vivenda usada incrementouse en 5,3% en taxa interanual, taxa 2,5 puntos inferior á do trimestre anterior.En taxa trimestral —cuarto trimestre de 2022 sobre terceiro trimestre do mesmo ano—, o prezo da vivenda libre baixou 0,8%, rexistrando así a súa primeira taxa negativa desde finais de 2020.
No que atinxe á variación trimestral, o prezo da vivenda nova repuntou en 1,9% no último trimestre do ano pasado, mentres que o das vivendas de segunda man retrocedeu 1,4% en comparanza co terceiro trimestre de 2022.
