Os gobernos portugués e español veñen de presentar ante a Comisión Europea (CE) unha proposta preliminar que estabelece un prezo de referencia do gas de 30 euros por megavatio (MW/h), para intentar abaratar o prezo da electricidade.
Así o confirmou a vicepresidenta terceira e ministra de Transición Ecolóxica, Teresa Ribera, na súa visita á comarca do Bierzo, onde presentou o proxecto 'La Térmica Cultural' nas instalacións da central térmica de Compostilla I. .
Ribera deixou claro que se trata dunha proposta conxunta formulada por ambos os Executivos, e que está aberta á negociación coas autoridades europeas.
O presidente do Goberno, Pedro Sánchez, anunciara na segunda feira que o Estado español e Portugal presentarían esta semana a Bruxelas unha medida "excepcional e temporal" para fixar un prezo de referencia do gas, tras lograr unha "excepción ibérica" no Consello Europeo da pasada sexta feira, que permite adoptar medidas únicas para baixar os prezos da electricidade en ambos os países.
Sen "distorsionar" o mercado enerxético europeo
Sánchez subliñou que esta medida "non supón subvencionar o gas, non rompe os incentivos ás enerxías renovábeis nin aos fluxos eléctricos entre países" e permitirá ao Estado español e Portugal "baixar sensibelmente o prezo da electricidade de forma inmediata" e sen "distorsionar" o mercado eléctrico europeo. .
"Estou convencido de que a aprobación por parte da Comisión Europea terá lugar nun prazo moi breve e ao día seguinte aprobarase no Boletín Oficial do Estado (BOE) con efectos inmediatos na factura eléctrica dos cidadáns", engadiu.
O presidente do Executivo estatal asegurou durante a sesión de control desta cuarta feira no Congreso que o custo desta medida sería asumido polo propio sistema enerxético, é dicir, que non suporía a implementación de subvencións nin axudas públicas.