O prezo do gasóleo medrou 14,7% nos últimos 12 meses

Entre o 1 de febreiro de 2022 e o 1 de febreiro de 2023, o prezo do diésel encareceu 14,7% na Galiza, pasando de 1,494 a 1,713 euros por litro, segundo os datos ofrecidos polo xeoportal de hidrocarburos do Ministerio para a Transición Ecolóxica e o Reto Demográfico (Miteco). O Goberno do Estado pon fin ao desconto xeneralizado dos combustíbeis Desta forma, e a pesar da bonificación para o transporte profesional por estrada, o custo do gasóleo para os transportistas fica máis caro que 12 meses atrás, pasando de 1,494 a 1,513 euros por litro, 1,3% máis. A bonificación do combustíbel para o transporte profesional por estrada pasará a 10 céntimos por litro no segundo trimestre de 2023 A redución da bonificación do combustíbel a 10 céntimos por litro no segundo trimestre e a súa eliminación a partir de xuño suporía para o sector transportista unha alza do custo da súa actividade, máis no caso de que se cumpran as previsións dun incremento dos prezos nos próximos meses froito da inestabilidade do mercado global. Asegurado o subministro, afirma o Goberno español A subministración de gasóleo a nivel estatal está "asegurada" a pesar de que desde o pasado domingo os Estados da Unión Europea (UE) deixaron de comprar diésel a Rusia no marco das sancións impostas ao Executivo presidido por Vladimir Putin, segundo indicaron distintas fontes do Goberno estatal e do sector dos carburantes. Rusia advirte á UE de que limitar o prezo do petróleo prexudica os seus propios intereses Fontes da Asociación Española de Operadores de Produtos Petrolíferos (AOP) recoñecen que "moitos analistas" resaltan que a ausencia do gasóleo de Rusia "suporá un aumento da cotización internacional do diésel" porque é un dos principais exportadores de cru e de gasóleo xa refinado. A este feito únese, sinalan, que hai "moitos Estados" que teñen unha gran dependencia do gasóleo ruso. Segundo os datos dispoñíbeis de 2022, que non inclúen os de decembro, nos 11 primeiros meses do ano pasado no Estado español compráronse no exterior un total de 5,56 millóns de toneladas de gasóleo, dos que 714.000 procederon de Rusia, é dicir, 12,83% do total acumulado, unhas cifras coas que Rusia sitúase como o segundo principal provedor estatal de gasóleo. "Hai moitos factores e, por tanto, non se pode dicir que o diésel subirá tanto. Haberá que ver como todos eses factores se equilibran", valoraron as fontes. Por outra parte, desde o Miteco tamén agregaron que desde hai unha década que o Estado español presenta un saldo neto exportador de gasolinas e gasóleos, polo que as sancións sobre as importacións de cru e produtos petrolíferos procedentes de Rusia, por si soas, "non deberían supor ningún problema para a subministración". Con todo, matizaron que no Estado español pódense "sufrir os prezos internacionais elevados". Transportistas de Lugo piden manter as axudas Desde a Asociación Empresarial Transportes Río Miño (Aetram) advertiron esta cuarta feira de que emprenderán mobilizacións se non se mantén a bonificación do combustíbel máis aló da prórroga do Goberno do Estado español até o 30 de xuño para o transporte profesional por estrada. Ademais, a axuda pasará de 20 a 10 céntimos por litro durante o segundo trimestre. O presidente da asociación de transportistas de Lugo, Diego Arias, avanzou que, sen esa axuda, "sería inviábel" sobrevivir e deixou caer que "no caso de que a quiten" farán "algo". Previamente, o responsábel de Aetram advertiu dunha "suba importante" do gasóleo nas próximas semanas, que vinculou "co conflito con Rusia". "E xa están bastante caros os combustíbeis como para que teñan que subir máis", engadiu o presidente de Aetram. Arias dixo que coa bonificación "como está agora" os transportistas están ao límite, polo que "se sobe moito máis non vai ser suficiente". "No caso de que nolas retiren -as axudas-, teremos que facer algo, porque senón é inviábel, insisto", reiterou, para despois calcular en 1.000 euros o aforro mensual que esta bonificación supón para un vehículo medio de transporte que fai rutas no conxunto do Estado. O prezo "debería preocupar a todos os sectores galegos" O presidente da Federación Galega de Transporte de Mercadorías (Fegatramer), Ramón Alonso, en declaracións a Nós Diario, afirma "que a previsión é que o diésel volva superar os dous euros por litro nos próximos tres ou catro meses". "Hai que ter en conta que os vehículos subiron entre 40 e 50% nun ano e que o mantemento encareceu 30%, polo que, sumado ao problema do combustíbel, o sector está desesperado", sinala. "Fecharon un feixe de empresas e van fechar máis, e o problema é para todos os sectores produtivos, o prezo do carburante debería preocupar a todos os sectores galegos", conclúe. "Os cargadores deben pagar máis" A exportación de coches fica paralizada polo colapso dos portos da Unión Europea Ramón Alonso, presidente de Fegatramer, sinala que "os cargadores, os que nos pagan os transportes, teñen que entender que se soben os custos é necesario que suban os pagos". Unha situación que exemplifica co caso de Stellantis, "teñen os coches metidos en fincas porque non hai quen llos leve, uns porque non lle compensa o prezo que lle pagan e outros porque fecharon xa". Unha problemática, advirte Alonso, que "podería estenderse a máis sectores que o do automóbil".