martes 18/01/22

O prezo da vivenda na Galiza dispárase malia as dificultades de moitas familias para mercar

Un informe do departamento de Vivenda do Ministerio de Transportes, Mobilidade e Axenda Urbana amosa como o incremento da demanda despois do confinamento pola Covid-19 axudou ao valor taxado dos bens residenciais a seguir crecendo. Así, igual que os alugueiros, as contías que se demandan para mercar unha casa, con independencia das condicións nas que se atope non deixan de medrar.

A vivenda de nova construción escasea na Galiza, mentres aumenta noutros puntos do Estado. (Foto: Alberto Ortega / Europa Press)
A vivenda de nova construción escasea na Galiza, mentres aumenta noutros puntos do Estado. (Foto: Alberto Ortega / Europa Press)

O mercado inmobiliario da compra venda despuntou após os primeiros meses da pandemia, cando o confinamento en pisos levou a moita xente a apostar na vivenda en zonas periféricas ás cidades (tamén nalgunhas vilas afastadas, pero en xeral sen renunciar a moitos servizos) con un maior espazo. Non o fixo ao mesmo ritmo que o alugueiro, que se está a revelar como a alternativa máis buscada para independizarse cando antes o que atraía máis era converterse en propietaria ou propietario, pero iso non impide que os prezos sexan cada vez máis elevados.

Se colectivos expertos como a Federación Galega de Empresas Inmobiliarias (Fegein) xa teñen alertado de que cada vez hai máis dificultades para atopar un piso ou unha casa en alugueiro -por exemplo, pola decisión de destinar moitas a estancias puntuais dado que son máis rendíbeis-, os bens inmobles en propiedade son cada vez máis para un colectivo privilexiado.

A lectura pode facerse, sen ir máis lonxe, coas estatísticas do valor taxado da vivenda que fai o Ministerio de Transportes, Mobilidade e Axenda Urbana desde antes da crise inmobiliaria.

Segundo o último informe, relativo ao terceiro trimestre do ano en curso todas as medias acabaron subindo, quer en relación ao período comprendido entre xullo e setembro de 2020, quer a mesma etapa pero cinco anos atrás.

Na media de prezos estabelecida entre bens de máis e de menos de cinco anos, a da Coruña vén situándose na primeira posición. O metro cadrado págase até a 1.875 euros; en Compostela -pode que froito da desbandada de apartamentos para destinar ao turismo- a 1.743,8 euros e en Vigo a 1.581,5 euros.

Aliás, en Culleredo ascenden os prezos até máis de 1.300, en Cangas abeiran os 1.250 e en Vilagarcía cada vez queda menos distancia para chegar aos 1.000 euros.

Unha evolución rápida

Así, ao mirar atrás, tan só a despois da pandemia, cando a demanda comezou a ascender na Coruña pagábanse algo máis de cen euros por debaixo da cifra actual, en Compostela eran 80 euros menos e en Vigo arredor de 50 euros de aforro.

Regresando a 2017 -coa crise do ladrillo bastante superada- as contías estaban moi por debaixo. Por exemplo, na capital galega a media era de 1.486,2 euros.

O cambio fai efecto en todos os municipios que analizan as e os expertos en vivenda, pois en Culleredo cada metro cadrado valía polo menos 150 euros menos e Vilagarcía estaba nos 900 euros. Ademais, un piso na Coruña moito máis barato, ao rebaixar até 300 euros cada metro cadrado.

É dicir, un piso de 70 metros cadrados custaría (sen ter en conta a zona nin o estado por tratarse dunha media) 112,679 euros. A mesma propiedade estaría agora en 131.250 euros, sen chegar a sumar as cargas impositivas.

A explicación non está en que se fixeran máis taxacións porque os datos foron moi similares, senón unicamente no incremento de prezos por diferentes cuestións.

Moi pouca oferta de inmobles novos

Outra das cuestións que revela, dunha forma accidental, é que apenas hai construción de novos fogares. Á hora de comprobar as cifras do custe do metro cadrado en pisos e casas de menos de cinco anos de antigüidade, tan só os rexistros de seis municipios permiten estabelecer unha media.

É o caso da Coruña (2.275,7 euros o metro cadrado), Vigo (2.008 euros) e Compostela (1.849,5). Tamén de Oleiros (1.670,6); Pontevedra (1.347 euros) e Lugo (1.279,8 euros).

É dicir, as novas edificacións cotizan á alza, pois agás nos casos de Pontevedra e Compostela todas subiron con respecto ao mesmo período de 2020.

Como curiosidade á marxe, Ames e Cangas do Morrazo incorporáronse nos últimos tempos a estes documentos estatísticos que só analizan aqueles concellos con máis de 25.000 habitantes.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

O prezo da vivenda na Galiza dispárase malia as dificultades de moitas familias para...
comentarios