O prezo medio da luz para as persoas clientas de tarifa regulada vinculadas ao mercado grosista baixará esta cuarta feira até os 41,53 euros por megawatt e hora (MWh), o que supón un descenso de 63,48% a respecto desta terza.
Na poxa, o prezo medio da luz no mercado grosista, o denominado pool, sitúase para esta cuarta feira en 41,41 euros/MWh. O prezo mínimo, de 14,15 euros/MWH, deuse entre as 4 e as 6 horas, mentres que o prezo máximo rexistrarase entre as 19 e as 20 horas, con 79,74 euros/MWh, segundo os datos do Operador do Mercado Ibérico de Enerxía (OMIE).
Hai xusto un ano, o 28 de decembro de 2021, o prezo medio da luz no mercado diario era de 104,36 euros/MWh, o que significa que hoxe a luz é 60,3% máis barata que naquel intre.
A este prezo do pool súmase a compensación ás gasistas, que ten que ser abonada polos consumidores beneficiarios da medida, os consumidores da tarifa regulada (PVPC) ou os que, a pesar de estaren no mercado libre, teñen unha tarifa indexada, que para esta cuarta feira fica en 0,12 euros/MWh.
En ausencia do mecanismo da 'excepción ibérica' para topar o prezo do gas para a xeración de electricidade, o prezo medio no Estado español sería duns 93,7 euros/MWh, o que supón 52,17 euros/MWh máis que coa compensación para os clientes da tarifa regulada, que pagarán así 55,68% menos de media.
O 'mecanismo ibérico', que entrou en vigor o pasado 15 de xuño, limita o prezo do gas para a xeración eléctrica a unha media de 48,8 euros por MWh durante un período de doce meses, cubrindo así o próximo inverno, período no que os prezos da enerxía son máis caros.
En concreto, a 'excepción ibérica' fixa unha senda para o gas natural para xeración de electricidade desde un prezo de 40 euros/MWh nos seis meses iniciais, e posteriormente, un incremento mensual de cinco euros/MWh até a finalización da medida.
