O prezo dos alimentos sobe sen beneficiar produtoras nin transportistas

O Instituto Nacional de Estatística (INE) constatou esta semana a maior suba dos prezos do cesto da compra desde que existen rexistros. Os alimentos e as bebidas non alcohólicas encareceron 16,6% no último ano e fixérono 1,6% entre xaneiro e febreiro a pesar da rebaixa do IVE que o Goberno do Estado español aplicou en determinados produtos do cesto da compra. Os bens básicos viron aumentados os seus prezos nos lineais dos supermercados desde febreiro de 2022: o leite subiu 33%; o aceite de oliva, 33,5%; os legumes e as hortalizas, 23,6%; os ovos, 21,2%; e a carne, 17,3%. Os alimentos seguen sen dar tregua e encarecen 16,6% no último ano, a maior repunta da serie histórica na Galiza Ademais, o prezo dos alimentos desde a súa orixe no campo ás persoas consumidoras multiplicouse por 3,66 no mes de febreiro, segundo o último informe do Índice de Prezos en Orixe e Destino (IPOD) dos alimentos. Os produtos nos que menos se nota a diferenza de prezos entre a orixe e o destino foron o leite, os ovos e o aceite de oliva, e, aínda así, a diferenza é de 73%, 26% e 18%, respectivamente. O prezo dalgúns produtos en destino, como é o caso dos allos, chega a multiplicar por 877 o prezo que cobran os produtores en orixe. Produción A pesar do aumento dos prezos en destino, as persoas produtoras non ven aumentada a súa marxe de beneficio, máis ben o contrario. Manuel da Cal, coordinador xeral da Federación Rural Galega (Fruga), afirma a Nós Diario que "por parte da Administración, neste caso o Ministerio de Agricultura, non queren pór en práctica o que lexislan". Refírese así á Lei da Cadea Alimentaria, aprobada en 2013 coa finalidade de "mellorar o funcionamento da cadea de produción de alimentos". Esta lei estabelece que o prezo que perciba o sector produtor ten que cubrir os custos da mesma produción. "A Administración española non pon os mecanismos para que isto se verifique", declara Da Cal. Desde Fruga demandan que se controle o proceso "desde a orixe até o consumo" para saber cales son as marxes de beneficio de cada elo da cadea. "Se isto fose así, habería máis transparencia e menos desconfianza sobre a especulación que cada elo da cadea pode estar a facer", engade Da Cal. Consumir/producir Coincide neste aspecto Isabel Vilalba, secretaria xeral do Sindicato Labrego Galego (SLG). "Os alimentos non son calquera mercadoría, polo que ten haber unha regulación, unha cadea de valor que garanta a marxe de cada parte evitando especulación ou marxes abusivas", afirma Vilalba. "Cereais e materias primas similares seguen toda a dinámica das bolsas e dos mercados de futuros e todo isto acaban pagándoo, por un lado, os produtores, e polo outro, as persoas consumidoras, co aumento dos prezos dunha alimentación que debería ser accesíbel e saudábel", sentencia. En relación coa rebaixa do IVE aprobada polo Goberno do Estado, desde o SLG afirman que, en produtos como os lácteos, "afecta principalmente aos produtores do sistema de módulos, que deixan de ingresar os cartos que lle correspondían pola compensación". "Abordar a inflación así non é unha medida realmente útil", salienta Vilalba. Pola súa parte Félix Porto, secretario de Coordinación Sectorial de Unións Agrarias (UUAA) tamén fai fincapé na necesidade de facer cumprir a Lei da Cadea Alimentaria. "Os custos de produción que se ven incrementados teñen que repercutir no prezo que se paga aos produtores", di Porto ao respecto. "É fundamental que se tomen medidas que sexan boas para os consumidores pero que non repercutan unicamente nos produtores, pois este sector é o que máis sofre coa suba do IPC", afirma o coordinador sectorial de UUAA. Transporte Se ben o prezo á persoa consumidora aumentou, tamén o fixo o transporte dos produtos desde o punto de orixe ao punto de venta. O Observatorio do Transporte de Mercadorías por Estrada da Galiza (Otrame), unha entidade dependente da Consellaría de Infraestruturas e Mobilidade, deu a coñecer esta cuarta feira que os custos do transporte de mercadorías por estrada víronse triplicados nos últimos 12 meses. A Asociación Empresarial do Transporte de Mercadorías por Estrada da Galiza (Apetamcor), organización representativa na Galiza no transporte de mercadorías por estrada para pequenas e medianas empresas e persoas autónomas, confirma a Nós Diario a suba dos custos anunciada polo Otrame. Porén, a Apetamcor desvincula o aumento do prezo final dos produtos do incremento no custo do transporte. "No produto final que a cidadanía adquire nos supermercados o transporte representa unicamente 0,2% do prezo, polo que este sector non é o responsábel da suba do prezo dos alimentos. Que poden ser dous céntimos nunha botella de auga?", cuestiona a súa secretaria xeral, Miriam Otero. Estados europeos intentan frear a inflación Mentres o Estado español acordou unicamente rebaixar o IVE de determinados produtos do cesto da compra coa pretensión de paliar os efectos que a crise de prezos está a supoñer para as familias (unha medida que se mostrou finalmente insuficiente), outros estados da Unión Europea comezan a anunciar accións de maior calado. O Goberno portugués abrirá unha investigación sobre as excesivas marxes de beneficio dos supermercados e estudará limitar os prezos pola inflación. Ademais, a ministra de Agricultura e da Alimentação divulgou a pasada cuarta feira que crearán un símbolo que indique o "prezo xusto" dos produtos alimentarios que cheguen ás persoas consumidoras. O Goberno español abordará con diferentes sectores a alza dos prezos dos alimentos após encareceren 15,4% O Executivo francés e os supermercados acordaron limitar o prezo en máis de 500 produtos básicos para amortecer unha inflación alimentaria que en febreiro superou o 14%. Os produtos regulados estarán sinalados coa bandeira francesa para ser recoñecíbeis. O Goberno italiano aprobou un paquete de medidas contra a inflación que incorpora unha serie de "tarxetas de aforro" que funcionarán como vales para que os cidadáns e as cidadás poidan aforrar no cesto da compra.