O Fondo Monetario Internacional (FMI) prevé que o crecemento do Produto Interior Bruto (PIB) global se sitúe na contorna de 3% durante o próximos cinco anos, o que supón a peor perspectiva a medio prazo desde o ano 1990. O dato tamén está por baixo da media de crecemento do PIB global dos últimos 20 anos, de 3,8%.
"Esto fai aínda máis difícil reducir a pobreza, sandar as cicatrices económicas da crise da Covid e proporcionar novas e mellores oportunidades para todos", dixo a directora xerente do FMI, Kristalina Georgieva, durante o seu discurso de apertura das reunións de primavera do FMI e o Banco Mundial.
As novas previsións macro da institución coñeceranse a próxima semana. Con todo, Georgieva adiantou que as súas novas estimacións do PIB mundial implican que o crecemento será de menos de 3% este ano.
O dato non é novo, xa que as súas últimas proxeccións, publicadas en xaneiro, tamén adiantaban un crecemento de 2,9% para 2023 e de 3,1% para 2024. En todo caso, Georgieva salientou que o crecemento segue sendo "débil" en comparanza coa serie histórica, tanto a curto como a medio prazo.
Georgieva indicou que o obxectivo dos políticos debería ser lograr unha recuperación "robusta" a curto prazo á vez que se estabelecen os cimentos para un crecemento "máis inclusivo, máis sostíbel e máis forte".
Desta forma, a búlgara marcou unha serie de prioridades que se deberían seguir. En primeiro lugar situou loitar contra a inflación e salvagardar a estabilidade financeira, xa que "o crecemento robusto non se pode lograr sen ambas as cousas".
"Loitar contra a inflación volveuse máis complexo coas recentes presións do sector bancario nos Estados Unidos de América (EUA) e Suíza, o que nos serve como recordo do difícil que é transitar rapidamente desde un período prolongado de tipos de xuro baixos e ampla liquidez a tipos moito máis elevados e liquidez escasa", indicou a directora xerente do FMI.
En todo caso, subliñou que os bancos son agora máis sólidos e resilientes que na crise de 2008, aínda que instou ás autoridades para permanecer vixiantes no caso de que haxa vulnerabilidades ocultas no sector da banca e no financeiro non bancario.
Mentres non se manifesten maiores problemas, receitou aos bancos centrais seguir focalizados en atallar a inflación. Mais no caso de novas tensións financeiras, enfrontaríanse a unha contorna máis complicada. "É por isto que necesitan estar máis vixiantes e áxiles que nunca", afirmou Georgieva.