PharmaMar acada a autorización para o seu último ensaio do fármaco contra a Covid-19

O remedio para o coronavirus creado no Estado español someterase á proba en 600 doentes. A nova disparou o valor das accións da farmacéutica de orixe galego na Bolsa.

Imaxe da sede da empresa. (Foto: Ricardo Rubio / Europa Press)
photo_camera Imaxe da sede da empresa. (Foto: Ricardo Rubio / Europa Press)

A empresa farmacéutica de orixe galego PharmaMar comunicou hoxe que xa recibiu o permiso da Axencia Española de Medicamentos e Produtos Sanitarios para realizar o último ensaio do fármaco creado no Estado español para combater o coronavirus.

O primeiro paso, polo que se deu a coñecer a nova, foi informar deste visto e prace á Comisión Nacional do Mercado de Valores. Agora comezará a fase III do proxecto Neptuno, en virtude da cal se vai probar se a medicina Aplidin funciona para tratar a Covid-19.

Nesta etapa é cando se vai comprobar a validez da plitidepsina (que incorpora o remedio) para actuar contra este virus.

Malia que o proceso comeza no Estado español, agárdase que os estudos clínicos -previstos para 600 persoas que padezan síntomas moderados da enfermidade- decorran en paralelo noutros puntos de Europa, mais cada axencia ten que dar a súa propia luz verde.

O permiso logrouse a través do Procedemento Voluntario de Harmonización de ensaios clínicos da Unión Europea e sábese xa que se incorporarán Francia, Portugal e Suecia, polo menos.

Ademais, o reto agora está en conseguir que 600 cidadás sexan voluntarias para que lles inoculen o tratamento. En calquera caso, as e os investigadores xa contan con datos doutros 1.300 pacientes que foron tratados con anterioridade.

Debido a esta autorización,as persoas con accións da compañía viron como o valor destas na Bolsa subía até un 8%.

Comentarios