PharmaMar anunciou hoxe a creación dunha nova unidade de viroloxía co fin de investigar, desenvolver e achegar medicamentos en enfermidades víricas para as que aínda non hai tratamentos eficaces. No entanto, a empresa galega ten como principal obxectivo atopar un tratamento efectivo para a Covid-19.
Así o explicou á Comisión Nacional do Mercado de Valores (CNMV), pois atópase en plena fase de desenvolvemento clínico coa súa molécula plitidepsina como fármaco para pór coto ao coronavirus. Actualmente hai en marcha un ensaio clínico para avaliar "a seguridade e eficacia de plitidepsina en tres niveles de dose".
Desde Pharma Mar estiman que os resultados estarán dispoñíbeis no mes de outubro. Polo momento, a "plitidepsina demostrou en diferentes estudos preclínicos a súa eficacia contra o SARS-CoV-2 e outros tipos de coronavirus".
A molécula coa que traballa a multinacional do país foi investigada en ensaios in vitro en varios centros de investigación de referencia a nivel mundial como o Centro Nacional de Biotecnoloxía do CSIC, o Instituto de Patógenos Emerxentes do hospital Mount Sinai de Nova York, o hospital Germans Trias i Pujol Barcelona e o Institut Pasteur de Corea4.
"Estes estudos preclínicos demostran que plitidepsina in vitro elimina a carga viral da Covid-19 a concentracións nanomolares. Unha molécula con potencia nanomolar, como é o caso de plitidepsina, obtén a mesma eficacia que unha molécula con potencia micromolar, pero cunha dose máis de mil veces inferior a esta última", explica.
O presidente de Pharma Mar, José María Fernández, incidiu en que "o mundo está a vivir diferentes tipos pandemias de virus en diferentes zonas" e "cada vez son máis importantes e están a ter un gran impacto social e económico".
"Convivimos con virus en especies animais que son susceptibles de dar o salto de especie e acabar afectando ao ser humano. Por este motivo, necesitamos estar preparados para combater os virus que actualmente están a afectar e impactando gravemente á sociedade e aos virus que poderían vir nun futuro próximo. Isto, que é o que pasou co SARS-CoV-2, podería volver pasar", subliña.
Belén Sopesén, á fronte
Esta unidade de viroloxía estará liderada por Belén Sopesén, doutora en farmacia pola Universidade Complutense de Madrid cun programa de desenvolvemento directivo no IESE. Vinculada a investigación e desenvolvemento farmacéutico desde 1997, incorporouse ao grupo Pharma Mar en 2005 e desde 2020 é directora de asuntos corporativos do grupo.
Foi directora de investigación de mercados con anterioridade e ocupou ademais cargos directivos en dúas empresas do grupo como directora xeral e conselleira en representación de Pharma Mar de Xylazel e como directora xeral de Noscira S.A., outra compañía biotecnológica do grupo dedicada á I+D de tratamentos innovadores para enfermidades neurodexenerativas.
