"Non se pode permitir o peche dunha empresa viábel e solvente" aseverou a deputada nacionalista no Parlamento, Tereixa Paz. A parlamentar permaneceu ao longo de toda a noite pechada nas instalacións de T-Solar en Ourense, acompañada pola concelleira do Bloque Ximena González.
As traballadoras e traballadores desta empresa "punteira nas enexías renovábeis" protestan contra o peche das instalacións ourensás e exixen á Consellaría de Economía e Industria que acceda a manter unha xuntanza á fin de procurar unha solución que impida o desmantelamento de T-Solar. Neste senso, Paz, lembrou que o conselleiro Francisco Conde se comprometeu en sesión parlamentar a estudar calquera oferta que garantise a permanencia da actividade e dos 170 postos de traballo.
Aliás, a deputada urxiu á Xunta a adoptar unha decisión perante as ofertas presentadas por diversas empresas antes de que a "situación sexa irreversíbel". Desde o BNG anunciaron que permanecerán pechad@s c@s traballadoras e traballadores até paralizar o desmantelamento de T-Solar.
