Con pandemia, guerra económica

Vén sendo bastante tedioso ler, e escoitar (eu mirar xa non miro, que me dá grima ver a imaxe do acceso nasal e a da inoculación da vacina) a crónica diaria das novas sobre a evolución da pandemia: contaxios detectados, número de mortos (agora xa non se di o de patoloxías previas: material de segunda clase), UCIs ocupadas, “vencemos a curva”, e, finalmente a trapallada das vacinas. Evidenciouse a ausencia total de capacidade de negociación (que xa sospeitabamos) e lamentamos os resultados en saúde e mais en consecuencias económicas que dela se derivaren. Xestión da compra das vacinas A UE xestionou as compras de vacinas en nome de 27 Estados Membros. As empresas primeiramente escollidas foron Pfizer (USA), Astra-Zeneca (anglo-sueca), Moderna (USA). E, posteriormente, entrouse en tratos con Sanofi (Francia), Johnson and Johnson-Jansenn (USA), Cure-Vac (Alemaña) e Novavax (USA). De prezos e cantidades non se pode tratar con rigor porque, se agregamos as cantidades en xogo de cada negocio (segundo o publicado), resultaría que a UE acapararía 2.000 millóns de doses de vacinas. Mal mirado só se poderían precisar se houber que vacinar catro veces a cada europeu. E ben mirado dan para pensar nunha revenda. O caso é que das moi cativas informacións procedentes da Comisión Europea e as das empresas farmacéuticas involucradas, pódense desprender algunhas evidencias: A UE non estivo á altura das informacións oferecidas, pecou de precipitación política e creou falsas expectativas de solución da pandemia. En todo caso foi máis alá da ética política. A UE descoñece, e isto é grave, que as compañías en trato non teñen en Europa capacidade de produción das doses obxecto de mercado. Asociacións empresariais Todas teñen asociacións empresariais (de diverso tipo) con empresas chinesas e imos finalmente depender dunha fabricación con ritmo e condicións intraempresas no seo dunha estratexia mundial: Pfizer con Hisun; Pfizer-Hisun Pharmaceuticals; Astra-Zeneca con BioKangtai (comprometida a fabricar neste ano 400 millóns de vacinas), e até Bayer, que vende paracetamol (moi utilizado nesta pandemia), ten desde hai anos un acordo empresarial con XH Pharma para mesmamente producir alá o antedito fármaco. Galegos: cultivemos a planta da paciencia porque ha ser mellor a curto prazo que a vacina.