Os premios concedidos esta edición teñen en común a innovación do pan tradicional para o consumo específico en persoas con necesidades específicas. Deste xeito o primeiro galardón recibiuno un traballo sobre a celeaquía e a achega de alternativas para sortear as limitacións propias das persoas que sufren intolerancia ao gluten. A segunda foi un traballo sobre alimentación saudábel na poboación sénior e o terceiro sobre o cultivo do cereal en lugares de sombra.
A calidade é fundamental para manter a sona do pan galego
Fernando Almeida, técnico agrícola do Grupo Dacunha que colabora coa cátedra, explica a Sermos Galiza que o sector da panadería na Galiza evolucionou e tivo que responder ás necesidades do cliente. Apunta que “agora hai xente que ten necesidades particulares e non pode consumir o pan de toda a vida”. Recoñece que no sector agroalimentario houbo moitos cambios nos últimos anos e no do pan tamén. “Houbo que adaptarse”, asegura e indica que en boa medida a chegada das grandes marcas condicionou en parte o mercado. “Hai grandes empresas que son multinacionais que fan un pan dunha calidade discreta e aquí a pequena panadería tivo que adaptarse”.
A calidade é fundamental para manter a sona do pan galego e polo tanto as vendas. Almeida sinala que “hai fornos de pan que optan por uns prezos baixos e un elevado volume polo que obteñen unha calidade mediana” e outras “optan por unha calidade máis elaborada cunha materia prima con máis garantías”, engade. En todo caso "as panadería pequenas na Galiza teñen un perfil de apostar pola calidade.
O pan seguira na nosa mesa
A enquisa realizada á poboación sénior nun dos traballos gañadores constata que os hábitos non mudaron tanto mais a apreciación do noso pan si. A continuidade do pan na mesa está garantida para máis de 90% das persoas que participaron na enquisa aínda que tamén recoñecen un empeoramento do sabor e da textura deste produto.
