sábado 30.05.2020

Ourense e A Coruña, as peores cidades para mercar piso como investimento

Con 4,7% e 4,8%, respectivamente, Ourense e A Coruña presentan os retornos do investimento en vivenda máis baixos do Estado español.
Os locais comerciais son os investimentos máis rendíbeis (Arxina).
Os locais comerciais son os investimentos máis rendíbeis (Arxina).

Mercar un piso para sacarlle rendemento co alugueiro non é unha boa idea en cidades como Ourense ou A Coruña. Así o demostran os datos dun estudo realizado polo portal inmobiliario Idealista, que sitúa a rendibilidade bruta da compra dunha vivenda para poñela no mercado do alugueiro en 4,7% no caso de Ourense (só superada por Donostia, con 3,9%) e 4,8% no da Coruña. Son as máis baixas do Estado español, onde a taxa de retorno media mantívose estábel en 2019 en 7,4%. Con todo, segundo destaca o portal inmobiliario, as taxas das cidades galegas, aínda sendo as peores, multiplican por máis de dez a rendibilidade que ofrecen os bonos do Estado a 10 anos, que está en 0,4%. 

No caso das oficinas o retorno é maior, cunha rendibilidade bruta media do 9,9%, pero A Coruña segue a ser a excepción.   É a única cidade galega da que Idealista ten datos, e vólvese situar como a última da listaxe, cun retorno de 5,6%. 

Mellor mercar locais en Lugo

Do que si ten referencias Idealista é da rendibilidade dos investimentos na compra de locais para alugueiro. Neste aspecto, Lugo é a mellor alternativa no conxunto do Estado, cun retorno de 12,1%, segundo o portal inmobiliario. No extremo contrario figura novamente A Coruña, cunha rendibilidade de 6,8%. A medio camiño quedarían Ourense (7,9%) e Pontevedra (9,5%). A rendibilidade bruta media ao final do ano dos locais comerciais situouse en 8,9% no conxunto do Estado.

Se os locais son o produto máis rendíbel, no extremo oposto figuran as garaxes, cunha media de 6,7%, atendendo aos resultados do portal inmobiliario Idealista. En Ourense, o retorno é menos da metade da media (3%), namentres na Coruña a taxa sitúase en 4,9%.

comentarios