Un total de 125 banqueiros españois gañan máis dun millón de euros ao ano. O Estado español é o cuarto de Europa (tras Reino Unido, Alemaña e Francia) con maior número de executivos que cobran unha cifra máis de seis ceros. Así o apunta o informe da Autoridade Bancaria Europea (EBA).
No Estado onde houbo que inxectar miles de millóns de euros en rescatar a banca, os seus altos directivos seguen a ter retribucións considerábeis malia os 'recortes'
O salario medio deses 125 banqueiros é de 2,4 millóns de euros. É a media máis alta de todos os estados europeos entre os altos executivos da banca que gañan máis dun millón de euros. En Alemaña, a media deses ingresos é de 1,8 millóns, igual cifra que en Austria. En Italia ronda os 1,6 millóns de euros ao ano de ganancia e en Francia anda por volta do 1,5 millóns.
Outro dato a ter en conta: Por cada 10.000 traballador@s do sector bancario hai cinco que cobran máis dun millón de euros anuais. En Alemaña son menos de 3 e en Francia, menos de catro.
O informe do EBA sinala que deses 125 banqueiros españois, 44 eran da banca de investimento; 21 da banca minorista e 60 doutras áreas. A remuneración total de todos eles foi de máis de 305 millóns de euros, dos cales dous terzos corresponden a soldos variábeis.