A OCDE propón que os tipos de xuro continúen a subir até finais de 2024

Só un día despois de que o Banco Central Europeo (BCE) acordara subir medio punto os tipos de xuro –o que cada quen paga a un banco a cambio de que lle preste diñeiro–, a Organización para a Cooperación e Desenvolvemento Económico (OCDE) insistiu esta sexta feira na "necesidade" de continuar nesta senda restritiva "até ben entrado o ano 2024". Non obstante, este 'think tank' das economías desenvolvidas tamén lanzou unha advertencia: o endurecemento monetario terá efectos negativos sobre o crecemento e os mercados financeiros. "A política monetaria debe seguir sendo restritiva até que haxa sinais claros de que as presións inflacionistas subxacentes se reduzan de maneira duradeira", sinalou a OCDE no seu informe de previsións Interim Outlook. "Aínda se necesitan máis aumentos nas taxas de xuro en moitas economías, incluídos os Estados Unidos de América e a zona euro", defende a organización con sede en París, Francia. O BCE volve subir os xuros até un 3,5% inédito desde 2008 A OCDE considera que, dada a lentitude no retroceso da inflación subxacente, é probábel que as taxas oficiais se manteñan altas até finais de 2024. "A inflación subxacente segue a ser persistente, sostida polo forte aumento dos prezos dos servizos e as presións sobre os custos derivados da rixidez dos mercados laborais. As presións inflacionistas obrigarán moitos bancos centrais a manter tipos de xuro elevados até ben entrado 2024", apunta a organización. Na Unión Europea, o BCE, seguindo unha folla de ruta consistente na suba do prezo do diñeiro, xa se aplicaron incrementos de até 3,5% desde xullo de 2022. Así e todo, a OCDE tamén recoñece que o "necesario axuste monetario para paliar a inflación" representa un "risco central". "O aumento da tensión nos fogares e nas empresas, e o maior potencial de incumprimento dos préstamos, aumentan os riscos de posíbeis perdas nos bancos e nas institucións financeiras non bancarias", apunta a OCDE. Ademais, para a institución, os cambios bruscos nos tipos de interese do mercado e no valor do mercado actual das carteiras de bonos tamén poderían expor aínda máis, din, os riscos de duración nos modelos comerciais de entidades. Así o puxo de manifesto a quebra do estadounidense Silicon Valley Bank nos últimos días. "Comezaron a aparecer sinais do impacto dunha política monetaria máis restritiva en partes do sector bancario, incluídos bancos nos Estados Unidos", apunta a OCDE, que tamén destaca que o crecemento crediticio real e agardado desacelerouse en varias economías, incluída a zona euro. "Limitado" risco de contaxio Por outra parte, a OCDE considera "limitado" o risco de contaxio das turbulencias financeiras en Estados Unidos e pola "delicada situación" de Credit Suisse. O derrube en bolsa da segunda entidade financeira de Suíza obrigou o banco a solicitar apoio do Banco Nacional Suízo (BNS), pedindo a este 50.000 millóns de francos (uns 50.750 millóns de euros). Após a solicitude, o banco suízo rexistrou esta sexta feira perdas de até 11% no valor das súas accións. A financeira Credit Suisse afunde en bolsa e reaviva o pánico no sector bancario A inestabilidade financeira estadounidense tamén afectou o Ibex 35. Os seis bancos que cotizan no Estado español padeceron os efectos da resolución de Silicon Valley Bank, Silvergate Bank e Signature Bank, co Banco Sabadell liderando as porcentaxes de perdas. Esta foi unha semana caracterizada por turbulencias no sector, que levaron o BCE a reunirse de urxencia para analizar a situación nos mercados financeiros. O seu Consello de Supervisión, liderado por Andrea Enria, reuniuse esta sexta feira de maneira extraordinaria en Fráncfort, Alemaña, para "intercambiar impresións e actualizar os membros sobre eventos recentes no sector bancario", explicou un dos portavoces do BCE. A xuntanza do banco central concluíu que non hai risco de contaxio pola crise de Credit Suisse e a banca dos Estados Unidos, coincidindo así coa mesma afirmación emitida pola OCDE. Xornada turbulenta A pesar das mensaxes de "tranquilidade" emitidas esta sexta feira, a xornada da sexta feira nos mercados foi, unha vez máis, turbulenta, coas bolsas europeas tinguidas de vermello. O Ibex 35 rexistraba, ás 13.55 horas, perdas de até 1%, similar aos descensos que anotaban as principais prazas europeas. Continúan os rescates bancarios Nos minutos previos á apertura de Wall Street, as accións do First Republic Bank tamén rexistraban un retroceso superior a 5%, a pesar da inxección de 30.000 millóns de dólares (uns 28.180 millóns de euros) recibida por parte de 11 bancos dos Estados Unidos. A intervención a pasada sexta feira, 10 de marzo, do Silicon Valley Bank, así como o feche do Signature Bank e do Silvergate Bank, provocaron perdas de até 78% no First Republic Bank. Ante o temor de que o banco colapsase e expandise a crise do sector financeiro estadounidense, máis dunha decena de bancos, entre os que se atopan os catro máis grandes –Bank of America, Citigroup, JPMorgan Chase e Wells Fargo– víronse obrigados a realizar depósitos non asegurados no First Republic. Segundo un comunicado destes catro grandes bancos, a inxección de 30.000 millóns de dólares "reflicte a súa confianza no sistema bancario do país e axuda a garantir que First Republic teña liquidez para continuar servindo a súa clientela". "O sistema financeiro dos Estados Unidos atópase entre os mellores do mundo", destacan, a pesar de que as crises en cadea das súas entidades está a provocar turbulencias no sector financeiro a nivel mundial. A creba de dous grandes bancos dos EUA causa "pánico" nos mercados globais A inxección da gran banca no First Republic prodúcese despois de que as axencias de cualificación S&amp;P Global Ratings e Fitch rebaixaran a cualificación crediticia do First Republic Bank á categoría de "bono lixo", ante a saída de depósitos da entidade. Sucedeu, tamén, despois de que os reguladores estadounidenses se comprometesen a apoiar o sector bancario após o colapso do Silicon Valley Bank.