O presidente executivo de Novagalicia Banco, José María Castellano, mostrouse feliz pola vitoria do PP na cita electoral do domingo. Castellano considera que as urnas deron o triunfo a un "goberno estábel", e que este é o mellor "para o banco, a cidadanía e para todos".
O responsábel da entidade financeira tamén se manifestou sobre a petición de rescate por parte do Estado español, considerando que esta solicitude se fará de forma inminente e que iso é o mellor, pois despexa incertezas. Aínda que Castellano indicou que facía as declaracións "como cidadán español", apuntou que non ve moitas opcións de que non se pida o rescate.
Preferentes
O presidente de NCG tamén se pronunciou sobre as preferentes e subordinadas, que só no que atinxe a esta entidade afectan pola volta de 45.000 persoas. Castellano considera que as mobilizacións e protestas deste colectivo están "politizadas" e mesmo afirma que "entre @s que se moven" nese ámbito "non hai afectad@s", engadindo que nin sequera "teñen familiares" nesa situación.
