A actual crise non deixa sector produtivo indemne. Nin a industria, nin a construción nin os servizos. Mais os sectores primarios (pesca e agricultura) están a ser banidos do mapa. Un escenario que confirman agora datos oficiais publicados polo Instituto Galego de Estatística (IGE).
Así, e entre o terceiro trimestre de 2009 e o primeiro trimestre de 2013, o número de ocupad@s en agricultura e gandeiría pasaba de 68.700 a 53.900 persoas. Unha queda de 14.800 persoas en pouco máis de tres anos. Neste sector perdeuse nesa etapa o 21,5% dos seus empregos. Unha destrución de por volta de trece empregos cada día.
Nestes tres anos e medio no campo e no mar perdéronse unha media de 20 empregos diarios
![Publicidade 196050]()
Perda constante e acelerada
No outro sector produtivo galego, o mar, a situación é aínda peor en canto a perda de persoas ocupadas. No terceiro trimestre de 2009 había 24.000 persoas traballando na pesca e acuicultura. Tres anos e medio despois, a principios de 2013, ese número era só de 16.400, segundo os propios datos oficiais. O que supón 7.600 persoas menos. En porcentaxe, o sector primario do mar perdeu o 31,7% dos e das súas ocupadas.
