venres 24.01.2020

“Non é só unha mobilización contra a Lei de Acuicultura. É contra as políticas da Xunta para o mar”

Mantense a manifestación nacional do sector do mar embora o anuncio da conselleira de retirar a Lei de Acuicultura. Falamos con representantes de diferentes sectores sobre motivos dunha mobilización que se prevé multitudinaria.

José L. Rodríguez, Asoar-Armega
José L. Rodríguez, Asoar-Armega

Este sábado, 27 de febreiro, Compostela acolle unha manifestación nacional convocada pola federación de confrarías co apoio e impulso de diferente sectores e colectivos, desde bateeiros (mexilloeiros) até frota de baixura, pasando por mariscadoras ou colectivos ambientalistas. Até a propia Xunta é consciente do masiva que pode ser o protesto, de aí que nestes días altos cargos do goberno, coa conselleira do Mar, Rosa Quintana, á fronte, declaren que a Lei de Acuicultura non vai ir adiante.

Neste Sermos Galiza número 184 [esta quinta feira en quioscos, librerías e na nosa loxa] publicamos unha reportaxe na que explicamos os por ques desta mobilización na que se prevé reunir a máis de 30.000 persoas, segundo cifra da Plataforma en defensa da Ría de Arousa, un dos colectivos que apoian o protesto. Falamos con mariñeiros, bateeiros, mariscadoras, biólogos... sobre unha manifestación que sobarda a exixencia de retirada do ante-proxecto da Lei de Acuicultura.

José Luis Rodríguez, mariñeiro e presidente de Asoar-Armaga, asociación de armadores de artes menores, a principal frota do noso país, composta por case 4.000 embarcacións; é unha das voces que aparece na reportaxe que incluímos neste Sermos Galiza nº184. “O día 27 imos estar todos unidos en Compostela: mariñeiros, bateeiros, mariscadoras....”, di, destacando que esa mobilización non é “só contra a Lei de Acuicultura”, senón unha emenda á totalidade ás “políticas desta Xunta para o sector do mar”. Rodríguez afirma, neste punto, que as actuacións e medidas da Consellería do Mar nos gobernos de Núñez Feijóo “atacaron directamente” a frota artesanal galega.

Motivos

A manifestación deste 27F chega após meses de mobilizacións do sector. Non só contra o ante-proxecto da Lei de Acuicultura, que actuou como catalizador do malestar existente nos sectores do mar, e que levou a que alcaldes e cargos do PP se posicionasen pola súa retirada. Os repartos de cotas, as mortandades masivas de bivalvos ante o “desleixo” da Xunta, as 'simpatías' da Consellería pola gran patronal conserveira fronte aos produtores, o que pasou con artes como o xeito, ... O 'memorial de agravios' do sector é amplo. Algo que se perfilaba xa en outono pasado,cando vilas como Rianxo, Cambados ou Vilagarcía acollían asembleas multitudinarias en auditorios ateigados até a bandeira para protestar contra as políticas da Consellería.

comentarios