Inmigración, empregos e salarios

Un dos vademecum máis utilizados polas extremas dereitas é o de que a inmigración lle quita empregos aos nativos e fai baixar os salarios. Unha aseveración que non resiste o contraste coas evidencias empíricas. Nas últimas décadas e practicamente en todo o Norte resulta cada vez máis difícil atopar un traballo "decente" ao tempo que moitos dos salarios medios e baixos reais se estancan cando non perden poder adquisitivo colaborando a que medre a desigualdade. Fallos do sistema capitalista nesta fase neoliberal pero que moitos dos dirixentes políticos achacan, entre outros, á inmigración. Un colectivo que, procedente maioritariamente de países do Sur global, "está disposto a traballar duro, máis tempo e por menores salarios" e que, por caso, en Galicia suma actualmente unha cifra superior aos 67.000 téndose incrementado un 70% nestes anos posteriores a pandemia: estamos falando só de traballadores estranxeiros con un contrato legal (dados de alta na Seguridade social). Os traballadores inmigrantes en situación ilegal seguramente sumen moitos máis: se pensa que estes supoñen 70% do total de inmigrantes. A inmigración medra cando medra o emprego Unhas cifras históricas pero que seguen medrando. Paralelamente e malia os incrementos na produtividade, o peso dos salarios na riqueza global está nos valores máis baixos do presente século (Galicia: 42,8%, España: 47,9%) o que confirma o incremento da desigualdade de ingresos se temos en conta, por caso, as cifras de ganancias que presentan as grandes rendas de capital (bancos, fondos, oligopolios..) auténticas beneficiarias daqueles incrementos. Unha tendencia que vén de moi atrás. Diante destas dinámicas parecera lóxico que se establecese unha relación de causalidade entre estes fenómenos: incremento dos traballadores inmigrantes - empregos insuficientes -salarios medios e baixos reais estancados ou a baixa. A realidade é que a experiencia histórica desmonta totalmente esta relación e para iso non temos máis que acudir ás evidencias empíricas, por caso, tomando o exemplo de Galicia e España. Os inmigrantes non rouban empregos senón que cobren vacantes A experiencia histórica demostra que a inmigración medra cando medra o emprego e diminúe cando tamén o fai o emprego. Así, Galicia e España teñen a estas alturas (2ºT 2024) uns dos maiores volumes de ocupación da súa historia recente: 1.135.600 en Galicia, 21.684.700 en España. Paralelamente tamén sucede o mesmo co número de inmigrantes empregados legalmente: Galicia: 67.123 (5,9%), España: 2.892.763 (13,3%). Unhas cifras históricas pero que seguen medrando. Que está pasando? Que se ben é certo que os traballadores con salarios medios/baixos son os máis prexudicados na policrise actual a relación causa/efecto coa inmigración non é a que nos contan senón todo o contrario. Os inmigrantes non rouban empregos senón que cobren vacantes, como pon en evidencia a relación negativa entre os niveis de desemprego (9,2% en Galicia, 11,5% en España, os máis baixos en décadas) e o nivel de inmigración, que podemos comprobar facilmente analizando que empregos teñen mais inmigrantes. Así vemos que non son os empregos estables e ben pagados os que acollen á inmigrantes e expulsan os nativos porque o crecemento da inmigración responde á falta de man de obra nalgúns sectores como "a agricultura, a pesca, a minería, a industria manufactureira, a hostalería e o comercio” en postos nos que “apenas e necesaria a formación". Postos pouco cualificados que os traballadores autóctonos por estar cada vez máis formados non acreditan ou non están capacitados para eles. Inmigración laboral A inmigración sería, xa que logo, unha reacción á demanda de determinados empregos xeralmente con menores salarios e peores condicións laborais. Empregos que, como sinalaba, non soe cubrir a man de obra autóctona polo que os traballadores inmigrantes convértense en traballadores complementarios que ademais axudan, no caso de traballadores cualificados, á incrementar la produtividade e a reducir a diferenza entre as rendas do traballo e do capital, que sería meirande sen os inmigrantes. En calquera caso todos os estudos feitos en países europeos con forte inmigración confirman que o impacto global da mesma nos salarios é moi mínima ou irrelevante e cando o ten é fundamentalmente sobre os outros inmigrantes. En España e en Galicia, na última década, cando se produce un incremento moi notable da inmigración, o salario medio anual nominal pasou no primeiro caso de 25.000 a 30.250 euros e no segundo de 20.241 a 24.170 euros.