Eses 4.500 millóns de euros referiríanse só aos efectos das dúas normativas dirixidas a limpar a carteira inmobiliaria da entidade financeira galega. Xa que logo, non se inclúe na cantidade as provisións a maiores que NGB tería que facer a resultas do que conclúan as auditorías que están a facer as dúas consultoras internacionais (Wyman e Berger)
Foi o propio subgobernador do Banco de España, Javier Aríztegui, quen na súa comparecencia na subcomisión de control do Fondo de Reestructuración Ordenada Bancaria (FROB) deu esta cifra.
Subasta
O número dous do Banco de España debullou na súa intervención o papel do banco na nacionalización de caixas como a que deu en NGB, e apuntou a que case que con toda probabilidade sexan subastadas.
En concreto, o banco galego podería ser subastado despois do verán.
No caso de que a subasta desta caixa quede deserta, o propio Goberno debería asumir o desembolso do capital preciso para cubrir as provisións que ten que facer para cumprir co saneamento inmobiliario.
Reaccións do BNG
Pola súa banda, Guillerme Vázquez, portavoz nacional do BNG, advirte: “ou imos a unha banca pública galega ou Novagaliciabanco desaparecerá como tal, ou ben absorbida por Bankia ou ben comprada a prezo de saldo polo gran capital internacional”. Vázquez non partilla en absoluto a estratexia do Goberno español de “nacionalizar para privatizar”, porque iso significa “que o pobo pague as facturas para que logo os beneficios vaian a petos privados”. “Nacionalizar para privatizar é unha estratexia que terá como resultado que Novagaliciabanco acabe en mans foráneas”, engade.
Guillerme remarca que neste momento é máis urxente que nunca “que se constitúa unha Comisión de Investigación no Parlamento galego para depurarmos as responsabilidades pertinentes pola desastrosa xestión técnica e tamén política que conduciu ao desaparecimento do sistema financeiro galego”. O portavoz nacional considera que a responsabilidade política no desastre de Novagaliciabanco atinxe “clarisimamente” a Feijóo, por non ter sabido liderar a defensa do aforro galego e por ter colaborado no deseño que conducirá a Novagaliciabanco á súa desaparición como entidade galega con centro de decisión en Galiza.