venres 03.07.2020
Desmente a versión do triunfo de Feijóo

Montoro esclarece que nunca falou de quita, senón de "reestruturación"

Afirma que as comunidades autónomas puideron aforrar "moito en forma de intereses" ao se financiaren cos mecanismos públicos -o FLA e o FFF. A Xunta optou por non acudir apenas a eses fundos, indo a mercados privados co conseguinte sobrecusto para as arcas públicas galegas.

Montoro e Feijóo no Ministerio de Facenda [Foto: Efe]
Montoro e Feijóo no Ministerio de Facenda [Foto: Efe]

As terminais mediáticas vinculadas a Feijóo -e á súa eventual candidatura ao relevo de Rajoy- venderon a cimeira desta terza feira en Génova como o cenario en que o presidente da Xunta tería arrincado de Cristóbal Montoro, ministro de Facenda, o compromiso de non realizar ningunha quita sobre os máis de 250.000 millóns de euros cos que as comunidades autónomas se financiaron a partir de 2012.

Montoro non tardou demasiado en esclarecer, nunha entrevista nocturna na COPE, que el nunca falara de quita e que, por tanto, a condonación da débeda nin estivo nunca sobre a mesa nen foi obxecto de negociación cos baróns do partido no xantar de traballo de Génova. Un desmentido en toda regra á versión dalgúns meios -alimentada polo propio Feijóo- de que estaríamos perante un triunfo diplomático do presidente da Xunta.

"Eu nunca falei de quitas. E se saen contentos os presidentes do PP dicendo que non hai quita, pois estupendo. Coincidimos todos!", dixo irónico.

A seguir, o ministro de Facenda enfatizou que "iso non quere dicer que non reestruturemos esa débeda". Non tería sentido non facelo, dixo, nun momento en que se está a negociar un novo sistema de financiamento -o actual, de 2009, caducou a finais de 2014- e en que as comunidades autónomas deberían voltar a se financiar normalmente na banca privada.

Grazas aos mecanismos públicos de financiamento -dos que a Xunta apenas se beneficiou por unha decisión política de Feijóo-, "Valencia", exemplificou Montoro, "en vez de ter débeda frente a un consorcio bancario internacional tena co Estado".

A reestruturación pode contemplar distintas fórmulas, mais en todas elas as comunidades autónomas debedoras acharán un alivio para as súas finanzas.

comentarios