A pPlataforma en defensa do sector leiteiro organizou esta mañá unha nova protesta con baixos prezos do leite e contra as ameazas da non recollida que padecen. A mobilización tivo lugar en Santa Comba, a onde acudiron milleiros de gandeiros e gandeiras de distintos puntos do país, provocando atascos de máis de 8km para entrar na localidade.
Pasadas as 12h, tivo lugar a concentración de tractores –un milleiro, segundo a organización- no multiusos de Santa Comba, de onde partiron en manifestación a partir das 13h cara ao Concello. Foi diante da casa consistorial onde tivo lugar a lectura do manifesto reivindicativo. Os e as produtoras non estiveron soas, pois en solidariedade contaron co apoio dos e das comerciantes da comarca, que fecharon as portas de 12h a 14h para favorecer a participación na xornada de protesta.
Na lectura do manifesto a cargo dun neno, o sector leiteiro exixiulle á Xunta de Galiza e ao Ministerio de Agricultura a súa implicación na busca de solucións para os e as produtoras, dados os baixos prezos que se pagan polo leite. Os membros da plataforma sinalaron tamén que “non é de recibo” que en outros países como Francia se solucione o problema leiteiro pactando un prezo do leite, mentres a Xunta e o Ministerio “miran cara outro lado”.
A de Santa Comba foi a primeira mobilización logo da gran protesta que tivo lugar o 17 de xullo en Santiago na que milleiros de produtores e produtoras clamaron pola situación do sector. Coa tractorada de Xallas, a plataforma inicia un intenso calendario de protestas nas principais comarcas produtoras do país. Esta vaga de mobilizacións concluirá o 10 de setembro cunha gran marcha en Compostela.
Calendario de protestas
As próximas mobilizacións convocadas pola Plataforma terán lugar en Chantada o 6 de agosto; en Deza, o 11 de agosto; en Meira, o 20 de agosto; en Sarria, o 27 de agosto e en Curtis, o 3 de setembro.