As pensións galegas están 15 pontos por debaixo da prestación media no conxunto do Estado. A denuncia desta discriminación levou miles de persoas ás rúas do país, convocadas polo colectivo de xubilados e pensionistas da CIG.
As principais vítimas desta situación son as mulleres pensionistas, o que resulta en que unha de cada catro maiores de 65 anos estea na Galiza por debaixo do limiar da pobreza.
Con esta mobilización, o colectivo de xubilados e pensionistas da CIG quixo pór tamén o acento na denuncia das medidas anti-sociais dos gobernos do PP contra as persoas pensionistas -xa iniciadas no último goberno Zapatero- como o recorte nas prestacións ao non se actualizaren en relación ao incremento do IPC, o repagamento dos medicamentos ou o "roubo" das pensións das e dos emigrantes retornados.
En declaracións realizadas na marcha de Compostela, o secretario xeral da CIG, Paulo Carril, declarou que "na escalada de ataques aos dereitos sociais e aos dereitos laborais asistimos a unha campaña que ten posto o punto de mira nas pensións públicas na idea de seguir recortándoas, de seguir empobrecéndoas, de seguir prolongando os anos para o cálculo das mesmas e seguir afondando nunha realidade que provoca que en Galiza teñamos as pensións máis baixas do Estado”.
Carril acrecentou que as mobilizacións deste 27F terán continuidade o próximo 10 de marzo, Día da Clase Obreira Galega. “Na Galiza queremos emprego, salarios e pensións dignas”, engadiu.
