Medra o número de 'ricos' na Galiza malia a crise: 8.242 persoas cun patrimonio medio de 6 millóns de euros

A galega é a segunda maior cifra do Estado español após a de Madrid. Na última década duplicouse o número de persoas que declaran un patrimonio superior aos 30 millóns.
O empresario Amancio Ortega nunha imaxe de arquivo. (Foto: Europa Press).
photo_camera O empresario Amancio Ortega, nunha imaxe de arquivo. (Foto: Europa Press)

Os contribuíntes que declaran patrimonios superiores aos 30 millóns de euros multiplicáronse por máis de dous na última década, pasando de 352 declarantes en 2011 a 724 en 2020, de acordo con os últimos datos da Axencia Tributaria sobre a recadación do Imposto de Patrimonio e referidos ao ano 2020.

Desta forma, e a pesar da crise económica e da pandemia, o número de 'ricos' no Estado español multiplicouse por 2,6. Só desde 2011, os cidadáns que declaran grandes patrimonios pasaron de 352 nese ano a máis do dobre en 2020, con 724.

Desde o inicio da recuperación económica o número de 'ricos' con patrimonios declarados superiores a máis de 30 millóns de euros non fixo máis que aumentar ao longo da última década, a pesar dun lixeiro retroceso en 2018 e cunha nova repunta no ano seguinte.

Os contribuíntes deste imposto alcanzaron os 218.991 en 2020 fronte aos 212.284 dun ano antes, polo que máis de 6.700 declarantes novos sumáronse á declaración do Imposto de Patrimonio por un importe medio de 3,5 millóns de euros.

A Galiza e Madrid lideran o patrimonio declarado por contribuínte

No desglose dos datos, dos 218.991 declarantes do Imposto de Patrimonio en 2020, a maior parte concéntranse en catro territorios: Catalunya, con 82.465, que encabeza a lista a certa distancia co País Valencià, con 23.892 declarantes; seguida de Madrid (19.508) e Andalucía (18.997).

Con todo, na distribución por importe patrimonial declarado, a clasificación muda considerabelmente, xa que neste caso Madrid é líder cun patrimonio medio declarado por contribuínte de 10,3 millóns de euros. Na segunda posición fica a Galiza, cun patrimonio medio de 6,01 millóns, a pesar de que o número de contribuíntes por este imposto no país é de 8.242, circunstancia que se explica polo domicilio na Galiza do fundador e socio maioritario de Inditex, Amancio Ortega. A terceira praza ocúpaa Balears, cun patrimonio medio declarado de 3,9 millóns de euros, seguida de Canarias, con 3,5 millóns.

O Imposto de Patrimonio suprimiuse o 1 de xaneiro de 2008, mais tras a crise económica o Goberno de José Luis Rodríguez Zapatero recuperouno —en 2011—, en principio temporalmente até o ano 2013, pero o Executivo de Mariano Raxoi e agora o de Pedro Sánchez mantivérono e prorrogárono sucesivamente.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios