A pesar das restricións derivadas da pandemia e de estar Galiza fechada perimetralmente, os hoteis galegos recibiron ao longo do mes de marzo 85.795 viaxeiras e viaxeiros, dos que case 6.000 eran de fóra do Estado español.
As viaxeiras e viaxeiros rexistrados foron 3.714 menos que os do terceiro mes de 2020, cuxa segunda quincena estivo afectada polo confinamento.
En total, no mes de marzo, durmiron en hoteis galegos 79.898 persoas residentes no Estado español, o que supón case 6.000 máis que hai un ano.
Pola contra, as persoas de fóra do Estado baixaron significativamente (-9.547). Aínda así, a estatística de ocupación hostaleira do Instituto Nacional de Estatística (INE) reflicte que os hoteis galegos recibiron no terceiro mes do ano, 5.897 persoas residentes fóra do Estado español.
Incumprimento do fechamento perimetral
Os datos do INE non están dispoñíbeis por territorios, co cal, non é posíbel coñecer o número de persoas non residentes na Galiza que se hospedaron en hoteis galegos este mes de marzo malia estar o territorio fechado perimetralmente e malia permitirse só entrar e saír por motivos xustificados.
En canto ás pernoctas, sumaron 174.298 no conxunto da Galiza en marzo, 7.000 menos que hai un ano.
En comparación cos datos de 2019, en marzo aloxáranse en hoteis galegos 236.030 persoas, un 63% máis que este ano, dos que 189.698 eran residentes no Estado español e 46.332 de fóra do Estado.
