Máis de 2.000 despedimentos no naval de Ferrol nestes últimos meses. Un dato ao que engadir queos cacarexados compromisos de goberno autonómico e central (flotel de Pemex, dique flotante...) para cos estaleiros de Ferrolterra non se dan concretado. Mesmo semella que nunca se han concretar. E, aliás, promesas reiteradas desde hai semanas e semanas por eses mesmos gobernos do PP de que axiña chegará a solución que reactiva o sector naval e sexa un maná de carga de traballo e emprego para a comarca. Todo iso combinado explica que,máis unha vez, milleiros de traballadores do naval voltasen sair á rúa nesta quinta feira en Ferrol. E cortasen durante media hora a AP9. E que o cadro de persoal dos estaleiros xa anuncien novas e contundentes mobilizacións.
O voeiro do Comité de Empresa de Navantia Ferrol, Ignacio Naveiras, lembrou a reunión mantida hai poucos días entre o presidente da Xunta e o español e ns que se falou de novas promesas para o naval ferrolá. "Os traballadores estamos fartos de ilusionismo. Xa abonda de xogar co destino dos operarios e da cidadanía da comarca".
Data concreta para inicio de construción do flotel
Unha das reivindicacións dos operarios nesta protesta é que se fixase xa unha data confreta de inicio para a construción do flotel de Pemex, encargo que desde hai meses se di conquerido por parte da Xunta mais que non se realizou. Mesmo desde México hai voces, como a Cámara de Industria, que afirman que ese buque se vai construir no país azteca.
