Industrias lácteas comunican ás granxas a baixada do prezo do leite a 39 céntimos o litro

Amultinacional Lactalis acaba de darlle unha "mala nova" ao sector lácteo galego. Esta semana comezou a mandar mensaxes a gandeiros e gandeiras produtoras lácteas de cara á renovación dos contratos da recollida do leite (a maioría vencen entre xullo e agosto). O anuncio de Lactalis, ao que tamén se sumou Leche Río, estabelece unha rebaixa de 2 céntimos por litro, o que colocaría o sector da produción láctea galega na situación anterior ao comezo da guerra de Ucraína, “daquela non se dispararan aínda os cuestos de produción e aínda aí non cubríamos cos prezos os custos de produción”, denuncian a Nós Diario gandeiros dedicados á produción láctea. Produtoras temen que outras empresas sigan á redución de prezos de lactalis Até o de agora o prezo ao que a industria estaba pagando aos gandeiros o litro de leite estaba en 0,41 euros. A través de mensaxes, os produtores lácteos veñen de coñecer esta semana que Lactalis vai rebaixar este prezo a 0,39 euros por litro. Os novos contratos entrarían en vigor maioritariamente en agosto. Por normativa a empresa tería que facerlles aos gandeiros e ás gandeiras unha oferta de renovación con 2 meses de antelación, e 15 días antes do vencemento do contrato presentarlles o novo contrato definitivo. No sector denuncian neste modus operandi, "outro incumprimento máis da industria". Desde o Sindicato Labrego Galego (SLG) o coordinador do sector lácteo, Xulio Fernández, explica a Nós Diario que levan varios meses denunciando estas prácticas de industrias como Lactalis e Leche Río “de destrución de valor na cadea alimentaria”, ofertando prezos á distribución á baixa “nunha clara operación de competencia que ten como consecuencia trasladar esa baixada de prezos directamente ás granxas”.Fernández lembra que estas prácticas non están permitidas segundo o artigo 12 da Lei da Cadea Alimentaria. As mensaxes da industria notificando unha nova baixada dos prezos do leite aos gandeiros e ás gandeiras por baixo dos 40 céntimos vén de alertar ao Sindicato Labrego Galego, que segundo explicou a Nós Diario Xulio Fernández, “ve fundamento suficiente para acudir diante da Axencia de Información e Control Alimentario e presentar unha denuncia por destrución da cadea alimentaria ao ofrecer prezos por debaixo dos custos de produción”. A multinacional lactalis notifica rebaixa nos pagamentos nos novos contratos Produtoras de leite que recibiron esta esta mensaxe de Lactalis aseguran a Nós Diario que esta nova baixada dos prezos do leite, sumada a outras anteriores que levan sufrido nos últimos tempos, “fai inviábel o sector leiteiro galego”. Aseguran que diante desta comunicación o único que poden facer é “pórse en contacto cos sindicatos para que nos defendan”. Moitos deles, segundo explica o SLG, acumulan nos últimos tempos rebaixas no prezo do leite que producen de perto de 20 céntimos, “son 20 céntimos menos por litro de beneficio e desde o inverno de 2023 hai algunhas que sofren mesmo 60 céntimos menos”. Co incremento nos últimos meses dos custos de produción, as contas non lle dan aos gandeiros e ás gandeiras de leite na Galiza. Industrias en cadea Denuncian produtoras aos sindicatos que o que vén de facer esta semana Lactalis marca, como modus operandi habitual da industria láctea, unha cadea que sempre se repite nestes casos. De feito, ao anuncio vía mensaxe de Lactalis aos seus gandeiros produtores de leite, seguiulle o de Leche Río, que tamén renovará contratos en agosto e sitúa polo momento o prezo por debaixo dos 40 céntimos, concretamente en 0,397. O Grupo Leche Río é propietario de marcas como Leche Río e Leyma, entre outras. Reny Picot oferta á baixa a renovación dos contratos Tamén ten moita presenza entre os produtores lácteos da Galiza a empresa Reny Picot, que está a seguir a tendencia marcada por Lactalis ofertando á baixa a renovación dos contratos de recollida do leite, aínda que neste caso só o fai a modo de anuncio e explica aos seus produtores na Galiza que non teñen que asinar nada polo momento, cumprindo así coa normativa que estabelece dous meses para presentar o novo contrato e 15 días antes para o definitivo. Noutros casos coma o de Entrepinares, que estaba pagando a 0,46 céntimos o litro, o anuncio da rebaixa sería de 3 céntimos, até 0,43. Este novo anuncio ao sector lácteo galego chega logo de coñecer a recente resolución da Audiencia Nacional a respecto da sanción imposta pola Comisión Nacional de Competencia contra as industrias do leite polo coñecido como “cártel do leite”, que operaba distorsionando os prezos do mercado e que se considerou un feito probado e demostrado polo menos entre os anos 2000 e 2013. As cousas non semellan ter mudado moito, e os gandeiros de leite veñen de colocarse diante dunha nova ameaza que até agosto previsiblemente voltará a levantar as voces no sector. Aliás, esta quinta feira, a Asociación Agraria de Galicia (Asaga) denunciou nun comunicado baixadas "inxustificadas" por parte da industria láctea de entre catro e seis céntimos por litro na renovación de contratos lácteos. No sector critican a "ausencia" da Xunta Este anuncio dunha nova baixada dos prezos do leite non colle de sorpresa o sector e os sindicatos, pero tampouco á Consellería do Medio Rural. As denuncias dos gandeiros teñen levado á Xunta a presentar no 2022 un informe, a instancias do anterior conselleiro do Medio Rural, José González, no que o propio goberno galego recoñece que a suba dos custos de produción os situaban xa en 0,41 céntimos, o que facía mesmo inasumíbel para o sector os prezos que agora mesmo estaban a recibir. O SLG considera que o daquela conselleiro puxo en marcha “unha inútil conta láctea” coa que a Xunta pretendía solucionar o ”problema da indefensión” do sector fronte á industria, pero “as labregas galegas seguen a estar indefensas diante da extorsión das industrias”. Desde o SLG, o seu coordinador do sector lácteo, Xulio Fernández critica ademais que logo dos cambios na Xunta e a toma de posesión da nova conselleira do Medio Rural, María Xosé Gómez Rodríguez, “fai semanas que temos solicitado un encontro para falar deste e doutros temas e até o momento nin se dignou a contestar”. En varias declaracións públicas desde a súa toma de posesión, a nova conselleira falou de que é “inasumíbel” para o sector soportar prezos ao nivel dos custos de produción, “terá agora a súa primeira oportunidade para pasar das palabras aos feitos”, din desde o sector.