domingo 18/04/21

Greenalia conecta a súa primeira instalación de xeración eléctrica á rede

Greenalia comeza a verter enerxía á rede a través do parque eólico de Miñón, de 24 megavatios de potencia.
Parque eólico de Miñón, en Vimianzo (Greenalia)
Parque eólico de Miñón, en Vimianzo (Greenalia)

Greenalia xa produce enerxía na Galiza. A firma coruñesa vén de poñer en marcha o seu primeiro parque eólico no concello de Vimianzo. Trátase do de Miñón, formado por seis aeroxeradores cunha capacidade de produción total de 24 megavatios (MW), no que a compañía investiu 28 millóns de euros. 

En declaracións a Sermos Galiza, o director financeiro de Greenalia, Antonio Fernández-Montells, explicou que a este parque seguirá o de Ourol, “xa moi avanzado”, que entrará en servizo no primeiro trimestre de 2020, e os de Alto da Croa (I e II) e Monte Tourado no segundo trimestre do ano. Tamén de xeito “inminente” a planta de biomasa de Curtis, de 50 MW, comezará a verter enerxía á rede. 

Todos estes parques forman parte do proxecto Eolo de Greenalia, que contempla un investimento conxunto de 87 millóns de euros que permitirá á firma de renovábeis obter 10 millóns de euros en ingresos en 2021 e un beneficio bruto de explotación (Ebitda) de 7,5 millóns. 

Xa contra final de ano, apunta o directivo, poderían sumarse os catro parques da segunda fase do proxecto Eolo, entre eles o recentemente adquirido aos donos de Jealsa, que cun investimento de 149 reportarán uns ingresos adicionais á compañía de 18,5 millóns de euros e un ebitda de 14 millóns de euros.

comentarios