Os grandes bancos elevaron as marxes até 80% pola suba de tipos en 2024

O economista grego Costas Lapavitsas sinalou á volta de 2006 que a acumulación por expropiación mediante o recurso ao uso indiscriminado ás comisións é o elemento que define o negocio bancario no tempo da 'financeirización'. Nesta liña, concluía que a súa función resultaba decisiva para garantir as marxes de beneficio necesarias, no contexto dunha tendencia decrecente da taxa da ganancia. A tese formulada por Lapavitsas é hoxe comunmente asumida polo conxunto do sector bancario. A este respecto, a economista do prestixioso servizo de estudos do BBVA Ana Rubio escribía en 2016 que o crédito deixará de ser o motor de ingresos da banca, polo que as entidades "xa non deberán estar tan centradas en medrar e expandir o balance, senón en dar servizos que consumen pouco capital", en liña co que se vén facendo nos Estados Unidos". Os beneficios derivados da marxe de xuros Os resultados das cinco primeiras entidades de crédito en presenza na Galiza no primeiro semestre deste ano así o demostran. Neste sentido, a primeira delas, Abanca, con 43% da cota do mercado galego, declarou que 764 millóns de euros de beneficios procederon da denominada marxe de xuros, a cifra resultante de restar ao diñeiro obtido con créditos o desembolsado a través dos depósitos. As marxes de xuros obtidas polas outras catro entidades de crédito con maior implantación no país alcanzaron os 14.265 millóns de euros, tras medrar 18,9% entre xaneiro e xuño de 2024 e rexistrar unha alza de 78,2% fronte ao mesmo período do ano pasado. Neste grupo atópanse Banco Santander, con 15% do mercado bancario galego; Caixabank, con 14%; BBVA con 12%, e Banco Sabadell, que posúe outro 6%. As cifras desagregadas por entidades ofrecen resultados diferentes. Nesta liña, lidera o incremento da marxe de xuros o BBVA, cun aumento de 82%, seguido de Banco Santander, cunha alza de 81%, e de Caixabank, con 76%. Uns resultados algo máis modestos presentan o Banco Sabadell, cunha suba da marxe de xuros de 60%, e Abanca, que experimenta unha repunta de 42,5%. As comisións As comisións representan unha porcentaxe cada vez máis importante no negocio bancario. A este respecto, o Banco de España recoñeceu o pasado mes de maio que as comisións das contas bancarias medraran no presenta no 3,4%, pasando o seu custo máximo de administración de 145,8 a 150,9. No mesmo informe sinalaba que os ingresos dos bancos a través das comisións eran até 1,5 veces inferiores á marxe de xuros. A suba dos tipos de xuro como resultado das políticas do Banco Central Europeo (BCE) repercute tamén no mercado financeiro galego. Neste sentido, o profesor da área de Fundamentos de Análise Económico da Universidade de Santiago de Compostela Juan José Ares apunta que en 2023 "o aumento nos tipos de xuro das operacións das entidades de depósito operantes na Galiza fíxose notar máis nos créditos que nos depósitos, elevando así a marxe de beneficio das entidades". Cambio nas contas "Como resultado da leve suba nos tipos de xuro dos depósitos bancarios, en 2023 produciuse un cambio de tendencia na distribución dos tipos de depósito que o sector privado mantén nas entidades de depósito na Galiza", asegura Ares, que explica que, en consecuencia, "por primeira vez na última década diminuíu a proporción de depósitos á vista en favor dos depósitos a prazo". Sobre esta cuestión, o Banco de España precisa que os aforros da poboación galega depositados nas entidades de crédito alcanzaron os 75.840 millóns de euros en marzo de 2024.