domingo 12.07.2020

Gamesa e Vestas resisten no sector eólico entre ameazas de feche

Galiza ten case 4.000 megavatios de potencia eólica instalada repartidos en máis de 180 parques eólicos. Porén, o país perdeu a oportunidade de liderar un sector, o das auxiliares de fabricación de pas, fustes e aeroxeradores eólicos, que chegou a dar emprego a máis de 5.000 persoas nos anos de bonanza. 
Pas para un parque eólico no porto de Ferrol (Greenalia)
Pas para un parque eólico no porto de Ferrol (Greenalia)

Galiza chegou a ter a comezos do presente século máis de 5.500 traballadores e traballadoras nas empresas auxiliares do sector eólico. Firmas locais como LM Composites, Emesa, Isowat ou Norvento foron protagonistas do nacemento dunha nova industria no país que viu truncado o seu crecemento coa chegada do PP á Moncloa e a aprobación de leis contrarias ao fomento das enerxías renovábeis. Algunhas delas xa desapareceron, e as que sobreviven fano con grandes dificultades. 

A comarca de Ferrol chegou a ser un referente nesta industria, que estaba chamada a aproveitar o bo facer dos traballadores do sector naval e a relanzar un territorio deprimido pola falta de oportunidades laborais. 

Empresas como Gamesa e a multinacional Vestas apostaron por instalar na Galiza fábricas de pas e fustes cando viron o potencial do que hoxe é o terceiro territorio con máis potencia instalada do Estado español, con case 4.000 megavatios (MW) repartidos en 187 parques. 

A saída do PP da Moncloa supuxo un novo renacer para a eólica, pero cando a industria volveu funcionar, moitas das firmas xa quedaran no camiño. Isowat foi a última en caer, como denunciou o propio cadro de persoal, pola "inacción" da Xunta e a falta de sensibilidade de Abanca, propietaria das instalacións.

Norvento é das poucas que resiste sen demasiadas dificultades. Emesa, agora en mans do Grupo Soil e coa Xunta como acredora, está nunha delicada situación económica que mesmo fixo acender as alarmas por un posíbel feche. 

E se a industria local está mal, a foránea non está moito mellor. Na planta de Gamesa das Somozas miran con preocupación os últimos movementos corporativos da multinacional, que xa anunciara despedimentos para o presente exercicio, e Vestas vén de despedir tres empregados, cando en xaneiro anunciara que non habería despedimentos este ano. No sector temen que ambos os dous xigantes poidan seguir os pasos de Alstom e marchar da Galiza para xa non volver.

comentarios