A Galiza, terceiro territorio do Estado onde fechan máis oficinas bancarias

BNG e PSdeG critican a "exclusión financeira" á que se ven sometidas tanto as persoas maiores, pola irrupción no sector das novas tecnoloxías en detrimento da atención presencial, como as que habitan en concellos rurais.
Protestas diante da oficina central de Abanca na Coruña polo feche de sucursais en zonas do rural (Foto: M. Dylan / Europa Press).
photo_camera Protestas diante da oficina central de Abanca na Coruña polo fechamento de sucursais en concellos do rural, o pasado setembro (Foto: M. Dylan / Europa Press).

A portavoz nacional do BNG, Ana Pontón, pediu esta segunda feira que a banca "se adapte ás necesidades das persoas maiores, e non os maiores aos bancos", ao mesmo tempo que instou a Xunta a que, da man de organizacións sindicais e sociais, lidere unha "fronte común" que "free os abusos da banca na Galiza".

A nacionalista participou na mañá desta segunda feira na Coruña nun acto simbólico de denuncia da "exclusión financeira" no país, acompañada por un grupo de persoas maiores e pola deputada no Parlamenrto Mercedes Queixas e o portavoz municipal do BNG na cidade, Francisco Jorquera. Alí, Pontón asegurou que na Galiza a exclusión ten "dúas caras": unha no rural, "onde xa non teñen ningún tipo de oficina bancaria á que acudir", e outra a respecto das novas tecnoloxías, "que no canto de seren unha vantaxe, están a converterse nunha carreira de obstáculos".

O fechamento de oficinas e o cobro por realizar distintas accións, entre outros, repercute sobre todo na xente maior, sinalou a portavoz nacionalista, posto que moitos "non teñen internet ou móbil intelixente, ou non usar computador, e non poden pagar un recibo, facer unha transferencia ou controlar os seus aforros".

"É moi triste ver como a banca maltrata aos maiores; unha banca que se rescatou co noso diñeiro, incluído o da xente maior. Destináronse máis de 90.000 millóns a rescatar a banca e así nolo pagan, en forma de exclusión financeira", lamentou Pontón, que asegurou que os maiores "non merecen perder a súa autonomía financeira".

Terceiro territorio no que máis oficinas fechan

A líder do BNG criticou tamén a política do presidente da Xunta, Alberto Núñez Feixoo, ao que acusou de "beneficiar con tres millóns de euros unha entidade bancaria para que poña caixeiros alí onde antes había oficinas, o que supón un efecto chamada". "Destruíronse máis de 5.000 postos de traballo e entre 2009 e 2019 fecharon 1.200 oficinas. A Galiza é o terceiro territorio do Estado español onde máis oficinas fecharon", asegurou Pontón, que subliñou que "non chega coa boa vontade", senón que "fai falta modificar as leis".

Chamou, ademais, a impulsar unha iniciativa social que permita "recuperar a capilaridade no país; non só no rural, senón tamén en moitos barrios de cidades onde están a fechar oficinas". Tamén apuntou que se debe apostar nunha Banca pública "con misión de servizo público, que poña no centro os dereitos da cidadanía e non a usura", e que permita que os aforros dos galegos fiquen no país. "Cada ano emigran máis de 20 mil millóns de euros de aforro galego", destacou.

Situación "dramática" para o PSdeG

A este asunto tamén se referiron esta segunda feira tanto o secretario xeral do PSdeG, Valentín González Formoso, como o portavoz parlamentario do PPdeG, Pedro Puy.

Así, en primeiro lugar, o dirixente socialista pediu a implicación da Xunta e das entidades bancarias para frear a "dramática" exclusión financeira que profunda na perda de servizos no rural, onde "se non hai colexio, banco nin centro de servizo médico, ninguén vai querer vivir". Aliás, cualificou de "acertada" a reflexión feita desde o Ministerio de Economía na liña de primar as entidades que manteñan os servizos abertos.

Pola súa parte, Puy sostivo que se trata dun "problema xeralizado do conxunto de España" após a "trasformación do sector". Así, aínda que dixo que "o comportamento do sector está a ser positivo", recoñeceu que na súa transformación "están a producirse algunhas cuestións" que o PP non comparte como a relacionada coa atención a persoas que viven en núcleos pequenos de poboación nos que "por criterios de rendibilidade" fechan esas oficinas.

Ante iso, destacou as accións postas en marcha pola Xunta, como a firma dun convenio coa Federación Galega de Municipios e Provincias (Fegamp) para levar os servizos financeiros aos municipios que o necesiten a través de caixeiros automáticos, de métodos móbiles ou oficinas que abren algún día da semana.

"A Xunta está a contribuír con recursos para que o criterio de rendibilidade económica que leva ás empresas a fecharen oficinas sexa matizado para que se dea un servizo público máis amplo", dixo, para incidir en que "é certo que hai un problema" e que "na Galiza se está tentando resolver con esas actuacións que van permitir que o dano que se fai polo fechamento desas oficinas sexa menor do que podería ser doutra maneira".

Comentarios