Se tivésemos que falar de heroes na crise do coronavirus, as traballadoras de supermercados estarían nas primeiras posicións. Gadis, para compensar parte do esforzo que están a realizar, decidiu fechar os seus estabelecementos onte e hoxe. Volverán abrir mañá con medidas extra de protección, como a incorporación de termómetros infravermellos de lectura de temperatura a distancia nos puntos de venda e almacéns para garantir que ningún empregado con febre se incorpore ao seu posto de traballo e poida acudir inmediatamente aos servizos médicos, apuntan desde a firma de distribución.
Esta medida súmase á dotación de pantallas de protección facial, xel hixienizante, luvas e máscaras ás traballadoras para garantir a súa seguridade e a da clientela.