Cada día, son moitas as persoas que empregan as liñas de vía estreita para se desprazaren, quer por motivos laborais, quer estudantís ou persoais. A eliminación dalgúns dos horarios --anunciado polo novo presidente de FEVE, que asegurou non estar disposto a transportar "ar"--, repercutiría de maneira moi negativa no noso país.
Marcos, é estudante e foi usuario durante un curso académico da liña Ribadeo - Ferrol, na súa opinión, "na Mariña é o único medio que pode responder para desprazamentos entre as as distintas poboacións da comarca", de suprimírense as liñas, Marcos asegura que "sería o fin do transporte de proximidade" pois na Mariña, asevera, "os autobuses non contan".
Redución de liñas a partir de outubro
Os cambios propostos suporían a redución, aínda máis, dos horarios e afectarían ás liñas de Ferrol-Uvieu; Ferrol - Ribadeo e Viveiro - Ribadeo. Para o alcalde de Ribadeo, Fernando Suárez, o único que se conseguiría sería "continuar a dispersar máis a nosa poboación e que haxa cidadáns de primeira e de segunda".
Malia que, hai uns meses o ministerio de Fomento aseguraba que o servizo de FEVE "non se tocaba", o certo é que a chegada de Marcelino Oreja á presidencia da entidade, cambiou os plans iniciais. Desde a Plataforma "Salvemos o Tren", asegura que "non se pode crer que un goberno diga unha cousa e logo non leve adiante os seus compromisos". Asemade, Galiza será un dos territorios que perderá mais liñas de FEVE, mentres se manteñen outras máis deficitarias en Asturies e Cantabria. Porén, a realidade é que o actual goberno español, aposta máis polas autovías do norte, "polo transporte privado para quen teña coche e poida pagar o combustíbel", aseveran desde a Plataforma.
