luns 01.06.2020
ORZAMENTOS 2020

Feixoo gábase de que Galiza vai ser “o lugar onde menos custe comprar unha vivenda de toda España”

O Executivo galego aproba no Consello desta quinta feira os orzamentos para 2020.

Alberto Nuñez Feixoo no Parlamento Galego [Imaxe: @Par_Gal]
Alberto Nuñez Feixoo no Parlamento Galego [Imaxe: @Par_Gal]

Galiza ten ante si o reto de frear o despoboamento do rural. Os orzamentos do ano pasado xa contemplaban medidas encamiñadas a fixar poboación nos concellos máis pequenos. Agora, coa aprobación das contas do 2020, o Executivo galego afirma que busca reforzar estas políticas con máis rebaixas fiscais

Os orzamentos que ten previsto aprobar esta quinta feira o Goberno galego na súa reunión semanal, inclúen entre as súas novidades unha nova redución do Imposto de Transmisións Patrimoniais até 5% para a adquisición de vivenda habitual no rural galego, que será, segundo o presidente da Xunta, Alberto Núñez Feijóo, “o lugar onde menos custe comprar unha vivenda de toda España”.

A rebaixa súmase á que fixera para o conxunto da Galiza na compra de vivenda habitual, que baixara de 8% a 7% neste gravame, un dos máis baixos de todo o Estado español.

Vantaxes para colectivos

No caso das familias numerosas, as mozas menores de 36 anos e as persoas con discapacidade o gravame pasara de 4% a 3%, e ficaban exentos no caso do rural no marco do programa ‘Impostos Cero’.

Con esta medida, que se suma a outros aspectos xa desvelados das contas do ano que ven, como o teito de gasto, a modificación das previsións de crecemento ou as cifras de emprego, a Xunta pretende garantir “a menor carga fiscal posible que permita a realidade económica”. Neste senso Feixoo subliñou que “Galiza sempre que sexa posible irá por diante en redución de impostos”.

Herdanzas gratis e dedución verde

Outro dos tipos impositivos que toca a Xunta no seu proxecto de orzamentos é o que afecta ao Imposto de Sucesións e Doazóns, que deixa exentas as herdanzas entre familiares directos de menos dun millón de euros, unha medida que beneficiará “a 99,9% da poboación galega”.

Tamén haberá deducións para cooperativas e sociedades laborais e introducirase unha “dedución verde” no IRPF de até 1.500 euros para a mellora da eficiencia enerxética das vivendas.

Feixoo gábase de que Galiza vai ser “o lugar onde menos custe comprar unha vivenda de...
comentarios