Isabel Tocino vai ser a nova presidenta do Banco Pastor, a entidade galega que a finais de 2011– en pleno proceso de esvaecemento do sistema financeiro galego- era adquirida polo Banco Popular. Ambos os dous, Pastor e Popular, fan parte desde xuño deste ano do Santander, que os comprou por 1 euro.
Tocino, deputada de AP/PP desde 1983 a 2002 foi ministra de Medio Ambiente con José María Aznar durante os anos 1996 a 2000. En marzo de 2013 foi fichada pola pasteira Ence como conselleira independente, cargo que lle renovou en 2016 por tres anos. A este posto, así como á súa presenza en Naturhouse, Enagás, engade agora Tocino o de presidenta do Banco Pastor e vicepresidenta do Consello de Santander-España.
“Estou certa de que a forza e dedicación de Isabel van ser esenciais no conxunto do Santander e moi especialmente na súa nova responsabilidade como presidenta do Banco pastor, que conta cunha grande implantación en Galiza”, afirmou a presidenta do grupo, Ana Botín.
Lembremos que o grupo está ás portas dun novo ERE que en Galiza podería efctar a por volta de 200 postos de traballo. "No banco non sobra ninguén”, subliñaba Rosa Conde, da CIG, ao se coñecer a intención de aplicar un novo ERE. Lembraba que na rede bancaria fanse "milleiros de horas extras a cotío". En todo caso, matizou, o que se precisaría "sería unha reordenación do persoal para cubrir as necesidades reais das oficinas, pero non despedimentos". "Está claro que o sistema financeiro, unha vez máis, pretende buscar maiores beneficios a conta de sacrificar traballadores e traballadoras que levan unha vida dedicándose a traballar, honestamente, para que agora veñan botalas á rúa", denunciou.
