Os Estados da UE critican a "condena" á pesca de arrastre e piden a Bruxelas revisar as medidas

Os representantes dos Ministerios de Agricultura e Pesca dos Estados da Unión Europea (UE) criticaron esta segunda feira o plan da Comisión Europea para eliminar a pesca de arrastre nas zonas mariñas protexidas para 2030 porque consideran que é "precipitado e desequilibrado" e que supón unha "condena" para esta arte. O español e o francés foron algúns dos Estados que amosaron un maior rexeitamento contra este plan de Bruxelas para ampliar as zonas mariñas protexidas de 12% a 30% así como as restricións nas mesmas, xa que ambos advertiron do risco de desaparición da pesca de arrastre de prosperar o Plan de Acción. Reunión chave en Bruxelas para determinar o futuro da pesca de arrastre O ministro de Agricultura, Pesca e Alimentación do Estado español, Luis Planas, subliñou que "dous terzos do peixe que consome a UE son importacións de terceiros Estados con criterios de sostibilidade totalmente distintos" que os que se impoñen nas augas comunitarias, polo que cualificou o plan da Comisión Europea de "desequilibrado e desenfocado", xa que considera que non ten en conta as súas consecuencias socioeconómicas. Na mesma liña, o ministro francés, Hervé Berville, criticou que as propostas de Bruxelas están "desconectadas" da realidade e advertiu de que se o plan de prohibir a técnica do arrastre se leva á práctica, estarase a "condenar" a pesca artesanal da UE. Unha preocupación que comparten tamén outras delegacións, entre elas a belga, a alemá, a grega, a irlandesa ou a neerlandesa, que incidiron en que a prohibición da pesca de arrastre "non é a mellor vía" para alcanzar os obxectivos climáticos que persegue a UE. Outro dos argumentos que tamén esgrimiron as representacións española, grega, italiana ou chipriota é a penalización que supoñen normas "ríxidas e inaplicábeis" que poderían implicar un incremento das exportacións de terceiros Estados onde non se garanten eses criterios de sostibilidade que si se exixen na UE. "Atribuír a este sistema de pesca responsabilidade exclusiva é unha simplificación extrema que non pode ser aceptada", aseverou a representación italiana, mentres que a polaca insistiu en que a "clave" está en garantir a "supervivencia" do sector. Unha afirmación apoiada tamén polos Estados bálticos, que recalcaron que o mal estado de certos ecosistemas non se debe exclusivamente á pesca e que, por tanto, esta "non debe asumir o peso de todas as medidas", á vez que advertiron de que as consecuencias socioeconómicas da eliminación total da pesca de arrastre poden ser "enormes". Os Estados da UE mostraron as súas reservas e preocupacións sobre o marco xurídico de aplicación destas medidas ou o estabelecemento duns prazos "particularmente axustados", polo que solicitaron a Bruxelas revisar os contidos do plan de conformidade cos Estados membros e co sector, a fin de desenvolver medidas "máis concretas, compartidas, equitativas e sostíbeis". Pola súa parte, o comisario de Medio Ambiente, Océanos e Pesca, Virginijus Sinkevicius, reiterou que o Executivo comunitario non propón a prohibición, senón que pide aos Estados que apliquen todas as medidas pertinentes antes de marzo de 2024, e que só entón, unha vez se avalíen, Bruxelas poderá presentar unha proposta lexislativa. Consciente de que se trata dun debate "complexo", animou aos Estados da UE para tratar de "atopar un equilibrio moi difícil mais que é fundamental" porque a pesca, a pesar do traballo "durísimo" do sector, "non sobrevivirá sen os ecosistemas", advertiu o representante comunitario. Neste sentido, o presidente da Xunta da Galiza, Alfonso Rueda, anunciou a súa intención de defender ante a presidenta da Comisión Europea, Ursula von der Leyen, na reunión que terán o 27 de marzo, os intereses pesqueiros da Galiza. "Temos argumentos dabondo para dicir que estas decisións se poden modular e mesmo corrixir para compatibilizar o medio ambiente coa pervivencia dun sector pesqueiro que aquí é fundamental", esgrimiu esta segunda feira. Cota de sardiña ibérica As frotas do Estado español disporán da cota de sardiña ibérica máis alta dos últimos anos, cun total de 18.962 toneladas, 4.000 máis con respecto ás que se dispuxo en 2022, segundo comunicou esta segunda feira o Ministerio de Agricultura, Pesca e Alimentación. A campaña da sardiña comezou esta segunda feira e a conselleira do Mar, Rosa Quintana, espera que sexa "un moi bo ano" porque, segundo dixo, o recurso atópase "moitísimo mellor que nos maiores anos de explotación". O cerco galego debe comprar cota noutros territorios para poder pescar sardiña Ao seu xuízo, o estado da sardiña "é unha mostra máis dos despropósitos que levan á Comisión Europea a tomar decisións equivocadas", posto que en 2018, segundo lembrou, propuña unha veda por 15 anos. Por outra parte, a tempada de pesca da anguía na desembocadura do río Ulla estenderase desde o 1 de abril até o 30 de setembro deste ano, segundo a publicación desta segunda feira no Diario Oficial da Galiza (DOG) pola que se aproba a renovación do plan de aproveitamento específico desta especie para 2023. Ademais, a UE e Noruega asinaron tres acordos bilaterais que limitan as capturas de arenque e que garanten que a UE recibirá o acceso a 9.150 toneladas de bacallau ártico para 2023, das cales 2.321 irán parar ás frotas do Estado español, segundo confirmou esta segunda feira o ministro de Pesca, Luis Planas. Ao mesmo tempo, a sinatura destes acordos bilaterais dotará Noruega de acceso ás augas comunitarias para pescar 150.000 toneladas de lirio durante o exercicio de 2023. A Deputación da Coruña compensará a frota polo paro biolóxico do xurelo A Deputación da Coruña dará axudas aos barcos do cerco e de artes menores afectados polo paro biolóxico de tres meses na pesca do xurelo, segundo informou o seu presidente, Valentín González Formoso, quen reclamou tamén á Xunta axudas para o sector despois de considerar que as axudas estatais polo paro biolóxico son "insuficientes para manter o custo das embarcacións paradas". Así o anunciou despois dun encontro esta segunda feira con representantes do sector pesqueiro no que tamén participou o vicepresidente da Deputación, Xosé Regueira. 71 buques galegos obterán axudas compensatorias polo veto do xurelo "A Deputación da Coruña, ante as dificultades dun sector estratéxico, non quere deixar de achegar o seu gran de area", sentenciou. Sobre as axudas, González Formoso precisou que se van a convocar de forma inmediata e que cobren os custos da Seguridade Social de todos os mariñeiros durante o tempo do paro biolóxico. "Poden recibir até 18.000 euros os 56 buques que están suxeitos a esta resolución", sinalou. Con todo, incidiu en que hai buques en toda a Galiza que non se van acoller ao paro biolóxico, "mais que si deberían estar a recibir axudas". "Tanto por parte do Estado como da Xunta, que cubrisen o impacto da medida aos buques que non van someterse o paro biolóxico", apostilou. A Deputación habilita axudas por 684.000 euros para apoiar á frota afectada polo paro biolóxico e as limitacións na captura do xurelo, cunha axuda de até 18.000 euros por embarcación. O secretario da Asociación de Armadores do Cerco da Galiza (Acerga), Alberto Castro, asegurou que todas as axudas son "benvidas", aludindo, ademais, á problemática que atravesa o sector no actual contexto.