O paro baixou en Galiza un 8,32% ao longo de 2016, o que supón que hai 18.200 persoas menos demandantes de emprego a finais de ano que nos seis comezos. Un descenso importante mais que fica lonxe da media española. Neses 12 meses, o paro reduciuse no estado en 11,3%, ou sexa, tres puntos máis. Son datos que vén de publicar o Instituto nacional de estatística (INE) na súa Enquisa de poboación activa (EPA).
A taxa de paro de Galiza está en 16,3%, por baixo da española, que se sitúa en 18,6%. Ora ben, o noso país é o que peor rexistro ten de todo o norte do estado. O único cuxo desemprego supera 16%. En Euskadi, Nafarroa e Cantabria non chega ao 13%. En Asturies, Castela-León, Madrid, Aragón e Catalunya anda entre 13 e 15 por cento. Hai no noso país máis de 200.00 persoas no paro: 204.200, segundo a EPA.
Volvemos superar o millón de persoas ocupadas: 1.049.600. Mais a taxa de actividade (poboación activa a respecto da poboación en idade de traballar) de Galiza está en 53,37%, a distancia do perto de 59% que ten a media do estado español.
Desde a CIG lembran que o cuarto trimestre de 2016 rematou cun total de 204.200 persoas desempregadas en Galiza, o que supón un descenso do paro do 2,6% respecto do trimestre anterior. Hai 2.600 persoas desempregadas menos que no trimestre anterior pero esta cifra é consecuencia da significativa caída da poboación activa que aínda fixo caer en maior medida o número de ocupados.
