martes 18/01/22

A economía galega modera o seu crecemento a 3,2% no terceiro trimestre

O produto interior bruto (PIB) galego moderou o seu crecemento ao 3,2% no terceiro trimestre do ano, en relación co mesmo período do ano anterior, segundo os datos que publica a sexta feira o Instituto Galego de Estatística (IGE).

Obras de construción dunha promoción de vivendas. (Foto: Europa Press)
Obras de construción dunha promoción de vivendas. (Foto: Europa Press)

No segundo trimestre, a taxa interanual alcanzara o 16%, mentres que no primeiro ficou en negativo, cun descenso do 2,4%. Mentres, en taxa intertrimestral, rexistrou este terceiro trimestre un aumento do 1,4%.

Desta forma, a pesar de frear a súa alza, a subida anual que experimenta a economía galega no terceiro trimestre é a máis elevada desde o cuarto trimestre de 2018.

Ademais, este aumento do 3,2% é superior no medio punto ao avanzado polo Instituto de Estatística (INE) para España, que se fixou no 2,7%.

Desde o punto de vista da demanda, o consumo das administracións públicas incrementouse un 4,6% (por encima da media) e o gasto dos fogares galegos subiu un 1,5%.

En canto á demanda externa, as exportacións de bens e servizos baixaron un 2,7% e as importacións de bens e servizos caeron un 5,7%.

No que respecta á oferta, só o sector servizos rexistrou taxas de variación positivas cun crecemento do 5,1%. Pola súa banda, a construción baixou un 5,6%, o sector primario descendeu un 2,2% e a industria un 0,2%.

Emprego

O emprego -medido en termos de postos de traballo equivalentes a tempo completo- tivo un crecemento do 4%, o que supuxo un incremento de 39.294 postos de traballo respecto do mesmo trimestre do ano anterior.

Isto implicou aumentos en todos os sectores, os maiores en construción (5,8%) e servizos (4,4%), cun avance do 4,7% na rama de comercio, transporte e hostalaría. Na industria os postos de traballo equivalentes a tempo completo creceron un 2% e no sector primario un 1,2%.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

A economía galega modera o seu crecemento a 3,2% no terceiro trimestre
comentarios