A Oficina estatística da Unión Europea (Eurostat) non vén senón constatar a nivel continental nun dos seus últimos informes o que desde hai anos é coñecido en Galiza: que temos un grave problema de emprego xuvenil. Galiza está entre os 40 territorios, dos máis de 400 rexións analizadas no documento do Eurostat, con máis paro entre a súa mocidade (entendendo esta até os 24 anos): un 48,5% en 2014. O que supón duplicar a taxa da UE dos 28, que está nun 22%.
Certo é que esta media europea faise en base a fendas moi pronunciadas entre as diferentes rexións e territorios da Unión Europea. Un abismo é o que hai entre a que ten máis paro na mocidade (Ipeiros, en Grecia, cun 69,8%) e a que menos: Oberbayern, en Alemaña, lander onde está Múnich. Aquí o desemprego entre a xuventude non pasa do 3,7%.
Entre os territorios da UE que pasan do 50% de paro na mocidade hai 10 do estadoe spañol, 8 de Grecia, 5 de Italia e 1 de Portugal, así como 3 rexións francesas (de ultramar). No Estado español a porcentaxe de desemprego na mocidade é do 53,2%, seguido de Grecia, cun 52,4% e Croacia cun 45,5%. Ou sexa, que Galiza (48,5) supera en taxa de desemprego nos mozos á gran maioría dos estados da UE.
E no que atinxe a aqueles mozos 'nin-nin', que nin estudan nin traballan, en Galiza eran en 2014 o 18,4% da xuventude, mentres que a media europea é de 16,3% e a do Estado español do 22,1%.
