Galiza perdeu perto de 56 millóns de euros de fondos europeos que se deixaron sen gastar correspondentes ao Plan de desenvolvemento rural (PDR) 2007-2013. É a denuncia que fai o Sindicato Labrego Galego (SLG) e que eleva esta cifra a 74 millóns de eiuros se a eses fondos de Bruxelas se lles engaden os que terían que achegar a administración galega e estatal. Unha perda de cartos “inxustificábel” e máxime nunha época de crise, denuncian desde este sindicato.
Lembran que a Consellaría de Medio Rural tiña un prazo adicional de dous anos para executar estes fondos. O PDR contaba para Galiza cunha achega de 888.801.564 euros do Feader (Fondo europeo agrícola de desenvolvemento rural). E a Xunta só executou o 93%, deixando sen executar 55.947.000 euros. “Desta maneira, Galiza está entre as seis comunidades do Estado que non chegan á media de execución do PDR, xunto a Madrid, Andalucía, Estremadura, Baleares e Valencia”, asegura o SLG.
Estamos, aponta esta organización,perante unha perda de cartos “inxustificábel no contexto de crise actual no agro, xa que estes cartos empréganse en catro eixes fundamentais para o medio rural: modernización de explotacións, incorporación de mozos e mozas ás actividades agrogandeiras, ordenación do territorio e melloras na produtividade da industria agroalimentaria e forestal”.