Un ano. Non durou máis no cargo Antón Arias, quen apresentou a demisión esta quinta feira 25 de xaneiro (asumiu o cargo o 27X de 2017).
Arias enfrontaba esta quinta feira un comité executivo "complicado" para el, segundo fontes consultadas por Europa Press. O seu mandato caracterizouse por posicionamentos progresistas en diversas materias, moi a contracorrente das tendencias maioritarias na burocracia empresarial que controlou historicamente a patronal galega.
En non poucas ocasións mostrou as súas discrepancias a respeito das sucesivas reformas laborais ao tempo que dixo estar a prol -a título persoal- dunha solución política negociada en Catalunya que pasase polo recoñecimento do direito a decidir do pobo catalán.
Desde hai uns meses, as presións para forzar a renuncia de Arias foron especialmente intensas desde as organizacións empresariais de Pontevedra e Ourense, co ex presidente da confederación José Manuel Fernández Alvariño como mascarón de proa dos críticos.
