Renato Núñez, secretario de organización da CIG na comarca de Compostela, achega a cifra de 28.000 fogares en que non entra ningún ingreso. Segundo os datos de paro rexistrado correspondentes a xullo, hai 104.132 persoas desempregadas que non perciben ningún tipo de prestación. “A isto hai que lle engadir as 80.000 persoas que reciben a renda activa de inserción (426 euros), que chega escasamente para cubriren as necesidades básicas”.
Dentro desta poboación, non están contabilizadas de forma diferenciada as persoas que perciben a renda correspondente ao Plan Prepara (400 euros durante 6 meses), que non se pagou neste mes pasado, por “problemas contábeis”, segundo o Ministerio de Emprego. Este 15 de agosto vencía a axuda orzamentada para este ano, pero Rajoy anunciou hoxe mesmo a súa prórroga, que se aprobará, con carácter retroactivo, no Consello de Ministros do día 24 de agosto. “Non creo que a eliminen, mais o problema é acceder a ela. Se poñen unhas condicións difíciles, aforraranse ter que facer público que a quitan”.
O Plan exixía que as persoas que se acolleren a el estean inscritas como demandantes de emprego entre o 16 de febreiro e o 15 de agosto deste ano e non teñan por outra vía ingresos mensuais superiores ao 75% del Salario Mínimo Interprofesional (641 euros), alén de non teren gozado de prestacións semellantes, coma a renda activa de inserción. "O estado non garante a subsistencia das persoas que quedaron fóra do mercado laboral".
Temporalidade e precariedade
Volvendo aos datos do paro en Galiza, hai unha leve redución estacional (do 3,35% a respecto do mes de xuño, en calquera caso, menor que a do ano pasado por estas datas): “o paro pode estar diminuíndo por un efecto rebote: as persoas que non reciben ningún tipo de prestación e que non ven garantido atopar emprego permanecendo inscritas como demandantes, apártanse do paro ou mesmo marchan do país”.
Por outra parte, cómpre salientar a cada vez maior precarización dos contratos. Como exemplo, case a totalidade (o 94%) dos 78.016 contratos asinados en xullo son temporais. Coa reforma laboral na man, as empresas “optan por despediren a 77 traballadores indefinidos e contrataren outros en precario”. “No ano 2011 rexistráronse 700.000 contratos”, conta Núñez, “dos que a metade foron de menos de 15 días de duración”.
A presión do Banco Central Europeo, que propón baixar aínda máis os salarios para “aumentaren a competitividade”, incrementará a precariedade, mesmo entre @s emprendedor@s: “non teñen a garantía de seguiren traballando dentro dun ano, e non consomen”. Alerta Núñez de que a renda per cápita do Estado está xa por debaixo da media da Eurozona, e adoptando as medidas que propón o BCE “aumentará aínda máis o paro”.