A única construtora galega que cotiza en Bolsa creou unha compañía homónima (Constructora San José S.A.) en Malta en 2016. O propio Jacinto Valentín Rey González –alma máter do grupo– aparece nesa documentación como representante legal desta sociedade canda os seus fillos (o vicepresidente, Jacinto Rey Laredo, e Javier Rey Laredo, conselleiro) e outros once directivos máis de San José.
Como “representante local” en Malta figura Charles Rapa, quen ten cargos noutras 56 corporacións. O enderezo da filial é o mesmo co que aparecen rexistradas outras cinco empresas. Unha desas cinco é Bridges and Roads International Limited. Curiosamente, ten relación con outra coñecida construtora galega.
En Bridges Roads International Limited aparece como accionista Puentes y Calzadas Grupo de Empresas S.A., a construtora de obra pública de Sigüeiro. De director da empresa maltesa figura Juan Loureda Alberca, apoderado e, segundo a web do Máster Mascómex USC, responsábel internacional do Grupo Puentes y Calzadas.
O enderezo que comparten as filiais maltesas de San José e Puentes coincide co enderezo do bufete MamoTCV. Na súa web, MamoTCV ofrece “oficinas virtuais”, asesoramento en tributos e presume de que “as leis de Malta fixeron do país unha localización atractiva para o estabelecemento de servizos a empresas fiduciarias”.
[Podes ler a reportaxe íntegra no número 310 de Sermos Galiza, á venda na loxa e nos quiosques]