O Instituto Nacional de Estatística (INE) publicou na mañá desta quinta feira os datos actualizados da serie histórica que analiza os movementos no mercado inmobiliario, con rexistros até novembro de 2021.
Desta información despréndese que a compravenda de vivendas experimentou no citado mes unha caída de 1,3% en comparanza co mesmo período de 2020, con 1.638 operacións fronte ás 1.660 rexistradas no ano precedente. No conxunto do Estado, pola contra, a compravenda subiu 24,4%, pasando de 40.119 a 49.895.
Do total de vivendas vendidas, só 21,9% (360) eran de nova construción, fronte a 78,1% que eran de segunda man (1.278).
No que atinxe ao réxime das vivendas, a práctica totalidade (1.600; 97,7%) eran libres, fronte a 38 que gozaban de protección oficial (2,3%).
Na comparativa intermensual a compravenda tamén minguou no conxunto do país, pasando das 1.668 operacións de outubro de 2021 ás 1.638 de novembro (-1,8%).
Maior peso das herdanzas
A respecto das vivendas transmitidas por herdanza, en novembro do pasado ano foron 26,5% das totais (889 de 3.355, incluíndo 1.638 compravendas, 39 doazóns, nove dereitos de permuta e 780 por outras causas, alén das vivendas herdadas), unha porcentaxe considerabelmente superior á da media do Estado español, 20,1%.
En novembro de 2020 as vivendas herdadas na Galiza supuxeran 25,1% das transmisións totais.
