Segundo a Estatística de Transmisións de Dereitos da Propiedade (ETDP) de abril de 2022, publicada esta segunda feira polo Instituto Nacional de Estatística (INE), a compravenda de vivendas medrou na Galiza 7% en comparanza co mesmo período do ano anterior.
Así, en abril rexistráronse no país 1.666 contratos de transmisión de vivendas, o que supón 77 por cada 100.000 habitantes, a proporción máis baixa do Estado español, cunha media de 126 compravendas por cada 100.000 habitantes.
Do total de vivendas, a práctica totalidade (1.585) eran libres, mentres 81 gozaban do réxime de protección. Aliás, 1.321 eran fogares de segunda man e os 245 restantes vivendas novas.
A maiores, neste período transmitíronse 27 vivendas polo réxime de doazóns, sete por permuta, 812 por herdanza e 788 por outras causas.
Aliás, vendéronse 6.151 predios urbanos —dos cales 3.182 foron por compravenda, 56 por doazón, 14 por permuta, 1.395 por herdanza e 1.504 por outros motivos.
Datos estatais
No conxunto do Estado español, a compravenda de vivendas rexistrou un incremento anual de 11,9%, case cinco puntos por riba do dato galego.
Así, fica á cabeza Illes Balears, cunha repunta de 33,3%, seguida de Canarias, con 31%. No extremo oposto están Madrid (-2,7%) e A Rioxa (-9,9%).
