A compra sen glute sae 600 euros máis cara ao ano

As persoas con celiaquía da Galiza gastan de media 600 euros máis ao ano que o resto das persoas para sufragar os gastos de alimentación debido ao maior nivel de prezo dos produtos sen glute con respecto aos convencionais, segundo asegura a Nós Diario Gloria Bernárdez, presidenta da Asociación de Celíacos da Galiza (Acega). "As persoas con celiaquía somos as únicas que temos que sufragar o noso tratamento", lamenta Gloria Bernárdez Bernárdez explica que "as persoas con celiaquía somos as únicas que temos que sufragar o noso tratamento", razón pola que a organización que preside pide que se estabelezan axudas económicas para as persoas que sofren esta enfermidade, como xa fixeron hai anos outros Estados como Italia, Portugal, o Reino Unido ou Dinamarca. Chámome celiaquía e cheguei para ficar "Vimos sufrindo a diferenza de prezos desde hai moito tempo, e agora, coa inflación dos alimentos disparada, sufrimos un dobre castigo para os nosos petos", incide a presidenta de Acega. Bernárdez insiste en que a diferenza cos alimentos convencionais, "aínda que diminuíu con respecto á situación que se daba no pasado, segue sendo moi grande". A maiores, sinala, "trátase dunha enfermidade de orixe xenético, polo que en moitos casos sófrena varias persoas dunha mesma unidade familiar, agravándose o custo que teñen que soportar algúns fogares". Teresa Suárez, que padece da intolerancia ao glute, explica a este xornal que "ser celíaco ou celíaca non é unha opción que se elixe, é algo co que che toca vivir, polo que é unha enfermidade diagnosticada e tes unha dieta imposta por razóns de saúde". "Non comer un produto que a maioría das fábricas engaden aos seus produtos como un ingrediente máis para que obteñan maior volume, e en consecuencia sexa moito máis barato, non debería de supor un prexuízo tan grande para as persoas que sufrimos esta doenza", afirma. "Un paquete de galletas normal vale o duplo ou o triplo que as que calquera persoa toma no seu almorzo. Aínda que é verdade que agora hai pasta sen glute a uns prezos máis accesíbeis, a maioría dos alimentos para celíacos son artigos de luxo", sentencia ao respecto dos custos. Suárez fai especial fincapé no caso do pan, sobre o que sinala que "unha barra con glute pode valer 35 ou 40 céntimos de euro, mais unha persoa celíaca ten que pagar por un chusco de pan máis de un euro e despois metelo no forno, o que implica un custo a maiores, pois na actualidade son poucas as localizacións onde as persoas con celiaquía podemos atopar pan fresco sen glute", afirma. "O problema tamén reside en que o pan celíaco industrial, como todos os produtos procesados, ten un sabor moi malo e ademais un montón de azucre", engade. Un aspecto sanitario sobre o que tamén advirte a presidenta de Acega, neste caso derivado dos altos prezos, xa que, segundo explica Bernárdez, "o incremento do custo que soportan as persoas celíacas provoca en moitos casos que escollan ou mesmo se vexan obrigadas a non seguir estritamente a dieta que teñen imposta por prescrición, derivando en problemas de saúde de diversa gravidade", salienta. Dificultades na produción de alimentos sen glute Para Teresa Suárez, paciente con celiaquía, un dos problemas reside nas dificultades que teñen as empresas para producir alimentos sen glute. "Debería existir investimento público ou algún tipo de achega económica para as empresas que se dedican a producir os alimentos específicos aptos para persoas con celiaquía, porque por exemplo unha panadaría normal, se quere facer produtos sen glute tería que ter un obradoiro á parte, polo que fabricar produtos para persoas celíacas é moi caro". O prezo dos alimentos sobe sen beneficiar produtoras nin transportistas Unha cuestión, a do alto investimento e custo de produción, na que coincide Miguel Rey, dono da panadaría artesá MR del Río, en Santiago de Compostela. "Tes que facer unha panadaría nova, non podemos ter contaminación cruzada, para o que precisas moita limpeza e máquinas especiais", afirma. "Os produtos sen glute xa son máis caros e, co proceso de encarecemento que estamos a ver, faise complicado poder desenvolver un negocio neste sentido", engade. "Na nosa empresa damos unha garantía á nosa clientela. O que facemos é pasar unhas auditorías que aseguran a nosa calidade e que o produto non está contaminado e que cumpre coas normativas e regulamentos", explica o panadeiro. "Non chega con limpar ben a túa panadaría convencional e facer o produto sen glute, senón que precisas doutro obradoiro para evitar a contaminación cruzada", afirma. Ao respecto, prosegue, "facer todos esteas avaliacións para que se controle a calidade do teu produto ten un custo, e ese custo tes que engadilo no valor do produto final", culmina del Río. 25 anos da asociación de celíacos Para Gloria Bernárdez, presidenta da Asociación de Celíacos da Galiza (Acega), os 25 anos de historia da organización foron un período de avance para as persoas que sofren esta doenza, "aínda que o camiño por percorrer é moito". Os alimentos encarecen 16,6% no último ano, a maior repunta desde 2002 Agora, sinala, "hai máis variedade de oferta e menor diferenza de prezo, mais persisten inxustizas como que determinados tipos de pan sen glute non estean caracterizados como pan, impedindo que podamos gozar da rebaixa do Imposto sobre o Valor Engadido (IVE)".