A Comisión Europea propón a alta velocidade Vigo-Porto no Corredor Atlántico

A Xunta rematará e enviara ao Goberno español un plan de acción para actuacións loxísticas nos primeiros meses de 2022. As novas conexións entre ambas cidades deberían finalizarse para 2040.

Dous trens AVE nunha estación. (Foto: Europa Press)
photo_camera Dous trens AVE nunha estación. (Foto: Europa Press)

O tramo de alta velocidade Vigo-Porto conta co apoio da Comisión Europea que acaba de presentar a súa proposta de novo regulamento da rede transeuropea de transporte. Nela figura ese traxecto, segundo explicou esta cuarta feira o director xeral de Mobilidade, Ignacio Maestro.

A suxestión deste organismo deberá ser referendada agora polo Consello Europeo e polo Parlamento Europeo e este tramo inclúese "como parte do corredor de rede central ampliada" no marco do Corredor Atlántico.

Maestro sinalou, na comisión de Ordenación Territorial, que a pasada terza feira se produciu esta "moi boa noticia" para Galiza, un "empurrón' moi importante" para as comunicacións entre Galiza e Portugal.

Desta maneira, a Comisión Europea busca adiantar a finalización das principais partes da rede antes do prazo de 2050, de forma que para 2040 deberán completarse novas conexións ferroviarias de alta velocidade entre Vigo e Porto.

O director xeral de Mobilidade informou de que está previsto que entre xaneiro e febreiro estea listo o plan de acción de infraestruturas loxísticas para os próximos anos na Galiza, após diversas achegas do sector e entidades como os portos, que será remitido ao Goberno español.

Reducir os tempos do transporte de mercadorías

O plan de acción enmárcase na Estratexia Loxística da Galiza 2020-2028, que está a elaborar a Consellaría de Infraestruturas coa intención de reducir tempos de transportes de mercadorías cun fomento do ferrocarril  que na actualidade só move un 3% do total.

Na avaliación de "puntos críticos" na rede e accións de mellora necesarias márcase como estratéxicos os proxectos da saída sur de Vigo e o da conexión de tren a Langosteira, no porto da Coruña.

Todo iso coa intención de aproveitar tamén a oportunidade que supón a incorporación da liña ferroviaria Monforte-Ourense-Vigo-A Coruña ao trazado do Corredor Atlántico.

Comentarios